Categories
رمضانيات

شوربة مينستروني

الشوربة دي كأنها وجبة لوحدها. مثالية كسناك في نص اليوم او تاخديها معاكي الشغل.

١ ليتر شوربة فراخ مصفاة
١ بصلة احمر كبيرة
١ عود كرفس
١ فص توم
١ جزرة كبيرة
١ عود كرات
٢ كوسة صغيرة
١ بطاطساية كبيرة
١/٢ كوب فاصوليا بيضا مسلوقة
١ طماطم كبيرة او ١/٢ كوب طماطم شيري
زيت زيتون
١ ورق لاورو
١/٢ معلقة صغيرة ريحان
١/٢ كوب مكرونة صغيرة اللي تحبيها (ممكن لسان عصفور)
جبنة بارميزان للتزيين

هنبدأ بتحضير الخضار، كله يتقطع لمكعبات صغيرة و تحطيه جنبك.
سخني ٢ معلقة كبيرة زيت زيتون في حلة كبيرة.
شوحي الخضار في الحلة بالترتيب ده:
التوم و البصل
بعدين الجزر
بعده الكرات و الكرفس و الكوسة
حطيلهم ورقة اللورو و الريحان و قلبي لحد ما الخضار يطري، هياخد حوالي ربع ساعة.
دلوقتي تضيفي البطاطس و الفاصوليا و الطماطم.
تقليبة سريعة و ضيفي الشوربة.
قلبي كله كويس و خليه يغلي علي نار هادية حوالي ٢٠ دقيقة او لحد ما البطاطس تستوي.
دلوقتي زودي المكرونة و سيبي الشوربة تغلي ٨-١٠ دقايق تاني لحد ما المكرونة تستوي. حاولي ان المكرونة متتهريش عشان متبوظش قوام الشوربة.
زودي مياه او شوربة لو حاسة ان نشا المكرونة خلي الشوربة سميكة اوي. لحد ما توصلي للقوام اللي تحبيه.
خلاص كده، رشة ملح و فلفل علي ذوقك.
اغرفي المينستروني و اديها رشة بارميزان علي الوش.
احلي حاجة تقدميها مع شرائح باجيت محمص.