Categories
9 شهور

ازاى تختارى البوسيت او السترولر

انا بحب اخرج جداً و بحب انزل اتمشى كل يوم شوية و فكرت انه كمان الحركة هتساعدنى انى اخسر وزن بعد الولادة. الـStroller أو البوسيت مهمة لبره البيت اوى، و مش ممكن تستغنى عنها خاصة للسن الصغير قبل السنة. آدى اللى اتعلمته و انا بختار السترولر.

دلوقتى انتى اول حاجة تفكرى فيها هى استخدامك للبوسيت. مش زى زمان كان شكلها واحد و فيها كماليات و خلاص. دلوقتى البوسيت بتفكر فى احتياجات الأم كمان. هتلاقى العادية اللى بـ4 عجلات و السبورت او الـurban اللى بـ3 عجلات و دى اقوى شوية و مصممة مخصوص للأستخدام فى المدينة على الأسفلت، العجلة الواحدة اللى قدام هدفها انها تسهل التحكم. و آخر نوع هو الجوجر Jogger هى شبه السبورت جداً بس هتلاحظى ان العجل بتاعها اكبر و ارفع. دى دورها الأساسى للأمهات اللى بتنزل تجرى او تاخد السترولر معاها التراك. العجل الكبير هدفه انه يحافظ على ثبات السترولر و هتلاقى ان هيكلها اخف عشان تساعدك فى الحركة بسهولة. لو انتى نزولك خفيف يبقى العادية مناسبة ليكي. لو ناوية تمشى بيها فى الشارع او هتستخدميها كتير يبقى خليكي فى الـUrban.

• نيوبورن سبّورتNewborn Support او مصمم لحديثى الولادة: دى نقطة مهمة و مش كل الأمهات بتركز معاها. و هنا مش قصدى انها معاها كاريكوت. لأ، اقصد ان بيبقى معاها قطعة صغيرة بتركب تحت راس الطفل لحد عمر 3-4 شهور. القطعة دى بتدعم ظهر الطفل و راسه و بتحميه من الرجرجة او ان راسه تتحدف فى كل اتجاه اثناء دوران السترولر عند اى منعطف. ممكن تشتري القطعة دى منفصلة و تركبيها انتى لو مش هتيجى مع السترولر اللى عاجباكى.

• النضافة: مش كل القماش اللى على السترولر بيتفك. بس فيه ماركات بتركز ان القماش اللى مش بيتغسل ده يبقى مضاد للمياه او ووتربروف عشان متحتاجيش تغسليه، كفاية انه يتنضف بفوطة مبلولة. اعرفى ايه اللى ممكن يتغسل، اهم اجزاء هى بطانة الكرسى و مسند الرجلين و الشماسة. و اسألى كمان عن افضل طريقة للعناية بالشاسيه نفسه. ممكن يتغسل بمياه بصابون ولا لأ.

• الأمان: دى اهم نقطة فعلاً. خاصة لما الأطفال بيكبروا بيقوا عايزين ينطوا منها و احيانا بتتقلب. اتأكدى من ثبات السترولر على الأرض و اتأكدى من ان احزمة الأمان سهلة الفتح و القفل عشان متكسليش تربطيها لأولادك. و انتى فى المحل ضيقى و وسعى الأحزمة و فكيها و ركبيها تانى، رجى السترولر و شوفى العجل هيفضل ثابت على الأرض و لا لأ.

• النوم: الأطفال جدعان انهم بيناموا فى اى حتة بصراحة. لازم تبقى عارفة انه مهما حصل هيناموا و انتى بره. هنا بقى لازم تعرفى السترولر ضهرها بيتفرد لحد فين. فيه انواع مش بتتفرد خالص، كرسيها ثابت. بس عشان رقبة طفلك متتعبوش و يصحى مرهق، حاولى تجيبي اللى بتتفرد. كل نوع بيتفرد لحد معين، فيه اللى بتوصل انها تبقى مسطحة تماماً زى السرير.

• الفرامل: مش دايما موجودة فى كل الموديلات بس الفرامل دى مهمة لو طفلك حركته كتيرة و بتبقى خايفة السترولر تتحرك بعيد عنك. هتلاقيها زرار صغير عند العجل اللى ورا ممكن تقفليه و تفتحيه برجلك. و هتحتاجى تقفليها و انتى بتدخلى او بتخرجى البيبي من السترولر بدل ما تقعدى تجرى وراها. و هى عنصر اساسى من عناصر أمان اى سترولر عموماً.

• الحجم: مش بس حجمها و هى مفرودة. حجمها و هى متطبقة اهم بكتير. اكيد مش لازم تاخد شنطة العربية كلها او تملى مدخل البيت. احسن موديلات هى اللى بتطبق من النص لأنها فعلا بتبقى نص حجم اللى بتطبق من عند الشاسيه.

• بأيد واحدة One hand action: كفاية علينا البيبي ياخد كل الأهتمام. مش عايزة ابقى حاملة هم فرد و تطبيق السترولر و انا لوحدى و بصراحة برضه مش ببقى عايزة اقضى وقت طويل فيه و اسيب البيبي لوحده. دورى على الأنواع اللى سهل انك تفرديها و تطبقيها بأيد واحدة و مش محتاجة انك تفكى او تركبى اى قطع. ابعدى برضه عن اللى بتحتاج تقفليها بخطاف من الجنب لأن هتحتاجى ايديكى الأتنين. الموضوع ده كمان فى فتح و قفل الشماسة. احيانا بتبقى بزراير من الجناب لازم تدوسى عليهم فى نفس الوقت.

• الشماسة: لازم تكون كبيرة كفاية انها تحمى الطفل من الشمس بجد و مش نص وشه بس. و على فكرة مش هتحتاجيها للشمس بس، لما البيبي ينام و انتى برة هتقفليها عشان تقللى الأضاءة اللى حواليه و ينام فترة اطول. حاجة مهمة فى الشماسة انه يكون فيها فتحات تهوية عشان تحافظ على نوعية الهوا اللى بيتنفسه الطفل و متقللش الأكسجين. و يكون فيها فتحة من فوق تقدرى تبصى منها على الطفل و تطمنى عليه طول الوقت.

• دلعى طفلك: طبعا دى حاجات مش اساسية بس فعلا هتسهل عليكي الوقت بره البيت. ممكن تلاقى خطاف صغير تحت الشماسة، ده ممكن تعلقى منه لعب للأطفال الصغيرين ينشغلوا بيها او تربطى فيها كوباية المياه للأطفال اللى فوق السنة عشان متقعش على الأرض. الترابيزة الأمامية. ممكن متبقاش ليها لازمة اوى فى الأول بس اول ما البيبي بيتعلم يقعد بتبقى الفرجة على الدنيا مش كفاية أحياناً، الطفل بيبقى عايز يلعب. الترابيزة دى جميلة انه ياخد لعبة او كتاب و يعيش معاه. و للأكبر شوية بيبقى فيها مكان للكوبايات، تعلمى طفلك استخدامه و هتبقى حاجة ممتعة ليه و مريحة ليكى.

• دلعى نفسك بقى: انتى أكيد نازلة تعملى مشاوير. التراى او الترابيزة اللى بتبقى عند المقابض فوق دى ممتازة و بالنسبة لى مستغناش عنها. ازازة المياه بتاعتى و الموبايل و المحفظة بيبقوا فيها. بتنفع كمان لو البيبي مكملش اكله او العصير بدل ما بفضل ماسكاه فى ايدي يبقى قدامى عشان افتكر اكمله اكله كمان شوية. فيه موديلات بتيجى فيها مكان لتعليق شنطة الأم او شنطة الحفاضات. و طبعاً ده انا بشوفه مهم، زى الباسكيت اللى بيبقى تحت الكرسى. اكيد مش هتمشى شايلة كل حاجة على كتافك و تعليق الشنط فى المقابض بيبوظ توازن السترولر.

• الترافل سيستم Travel System: معناه انك تجيبي نظام كامل، سترولر و كار سيت او كرسى السيارة مع بعض. دى طبعا فكرة جميلة و موفرة لأن لو اختارتى صح هتجيبي الأتنين سوا ارخص من انك تجيبيهم منفصلين. هنا تركزى مع ان كرسى السيارة يبقى ممكن تركبيه على السترولر. دى تعتبر الميزة الأساسية للنظام ده. انك مش محتاجة تنقلى طفلك لو نايم او للصغيرين جداً اللى بيستريحوا اكتر فى كرسى السيارة. محلات مستلزمات الأطفال كمان مؤخرا بدأت تجمع ترافل سيستم من الموديلات المختلفة اللى عندهم. و هنا هتلاقى كل اللى محتاجة تعرفيه عن كرسى السيارة قبل ما تختارى الترافل سيستم.

2 replies on “ازاى تختارى البوسيت او السترولر”

Leave a Reply

Your email address will not be published. Required fields are marked *