Categories
Featured في البيت

٢٠ استخدام للخل فى البيت

اكيد على طول فيه خل فى البيت، و لو انتى زيي و مش غاوية تحطيه فى الأكل كتير هتلاقى ازازة الخل بتقعد بالشهور، و ممكن تشترى تانى قبل ما اللى عندك يخلص. ممكن كمان تجيبي نوع خل رخيص تجربى بيه الأول الافكار الحلوة دى اللى بأستخدم فيها الخل اول بأول.

١. نقطة خل على ليفة تنضيف الأطباق هتقتل اى بكتريا صابون الأطباق ميقدرش عليها.

٢. لتنضيف اسطح المطبخ، اخلطى معلقة كبيرة خل على 2 كوباية مياه. الأسطح هتلمع.

٣. ربع كوباية خل فى غسالة الأطباق و شغليها و هى فاضية على اقوى دورة. هتعقم و تنضف الغسالة.

٤. معلقة كبيرة خل على الغسيل الملون عشان تثبت الألوان و الغسيل ميبهتش على بعضه.

٥. جهزى بخاخة فيها كوباية مياه و 2 معلقة كبيرة خل و رشى بيها الأماكن اللى بيظهر فيها نمل. النمل بيكره ريحة الخل.

٦. بللى قطنة كبيرة خل و حطيها فى طفاية طول الليل عشان تمتص ريحة السجاير فى البيت.

٧. اغسلى الخضار و الفاكهة بدون مواد كيميائية. املى حوض المطبخ مياه و ضيفي لها 1/4 لـ1/2 كوب خل و انقعى الخضراوات فيها 10 دقايق قبل شطفها كويس.

٨. عشان تنضفى بقع الدهون على البوتجاز اخلطى معلقة كبيرة خل و معلقة كبيرة بيكربونات صودا لحد ما تبقى زى المعجون. ادعكى بفرشاه سنان قديمة البقع لحد ما تتفتت و بعدين اشطفيها كويس.

٩. رجعى النعومة للفوط القديمة بأنك تضيفى معلقة كبيرة خل مع الصابون فى الغسالة. الخل هيفتت اى بقايا للكالسيوم او الكلور من مياه الغسيل قبل كده.

١٠. لتسليك الأحواض، اخلطى معلقتين كبار خل على كوب مياه مغليه و صبيه مباشرة فى الحوض. الخل هيساهم فى تفتيت الدهون و هيعقم و يقتل اى روائح.

١١. نضفى فرش المكياج بغسلها فى كوب مياه عليه معلقة صغيرة خل و معلقة صغيرة شامبو.

١٢. شيلى الستيكر من على البرطمانات بنقعها فى الحوض مليان مياه فيه ½ كوباية خل.

١٣. للتواليت اخلطى 2 كوب مياه سخنة + ½ كوب خل + 3 معالق كبيرة بيكربونات صودا. نضفى بالخليط بفرشاه الحمام.

١٤. عشان تنضفى البانيو، فى بخاخة اجمعى 2 كوباية كبيرة مياه + ½ كوباية خل + ½ كوباية صابون سائل + 2 معلقة كبيرة بيكربونات صودا. رشى الخليط و سيبيه 10 دقايق قبل ما تفركيه بفرشة و بعدين تشطفيه.

١٥. عقمى ازايز المياه الأزاز بغسلها بـ4 كوبايات مياه دافية عليها 2 معلقة كبيرة خل.

١٦. عشان تشيلي بقع المياه من على الخشب. 2 معلقة كبيرة خل + 2 معلقى كبيرة زيت زيتون و تبللى بيهم قطعة قماش و تمسحى الخشب بيها.

١٧. 1 معلقة خل + كوباية مياه مغلية هيشيلوا اى بقع فى الحلل او العلب البلاستك.

١٨. عشان تعقمى القطاعات بعد كل استخدام، امسحيها بفوطة او منديل مبلول بخل.

١٩. تقدرى تشيلي اى بقع دهون على رخامة المطبخ بفوطة مبلولة بـ2 معلقة كبيرة خل + 2 معلقة كبيرة مياه.

٢٠. زودى معلقة كبيرة خل فى المياه اللى هتسلقى فيها البيض. هيمنع البيض من انه بنفجر فى المياه و هيسهل تقشيرها.

Leave a Reply