Categories
في المراية

٩ عادات اساسية لبشرتك ابتداء من ٢٥ سنة

كل سن و ليه نظام مختلف للعناية بالبشرة. لأن فى كل سن البشرة بتمر بمشاكل مختلفة و نسبة الكولاجين و الترطيب الطبيعية فى الجلد بيتغيروا. مع السن بتحتاجى تدخلى ترطيب اكتر و تحافظى على البشرة اكتر من الأول. 25 لـ30 مش كبيرة خالص. بس انتى بتبدأى تحافظى على الأساس من السن ده، عشان مع الوقت تفضل بشرتك نقية و تقللي من ظهور اى مشاكل.

١. الترطيب: حاجة بديهية يعنى. مش دلع، لازم تحرصى على ترطيب جسمك كله يومياً و وشك و رقبتك و ايديكى على الاقل مرتين فى اليوم. عشان تبدأى مع العادة دى خليها مرة اول ما تصحى و مرة قبل النوم.

٢. حوالين العيون: المنطقة دى بتحتاج عناية خاصة لأن الجلد فيها حساس جداً و بيتأثر بسهولة بالعوامل اللى حواليه. استخدام مرطب لمنطقة العيون يوميا ًكجزء من روتين الترطيب اليومي. دورى كمان على مرطب مع فيتامينات زى فيتامين هـ.

٣. الحماية من الشمس: مش بس و انتى فى الساحل. الحماية اليومية مهمة اكتر عشان تمنع بقع اللون المختلفة و تحمى من جفاف البشرة و الألتهابات. استعملى على الأقل SPF30 بصورة يومية. ممكن تدورى على foundation او BB cream يكون فيه حماية من الشمس.

٤. المياه: شرب لترين على الأقل مبقاش رفاهية. المياه بتوفر ترطيب من الداخل، هتلاحظى الفرق فى شعرك و ضوافرك و بشرتك عامة. كمان المياه بتشجع الدهون الطبيعية للجسم اللى بتكون طبقة خفيفة بتحمى البشرة و الشعر من عوامل الطبيعة.

٥. التقشير: كل ما بنكبر، عملية تجديد الخلايا الطبيعية بتبقى ابطئ و ده اللى بيدى الأحساس ان البشرة مطفية او جافة. مهم انك تشيلي الخلايا الميتة دى و تساعدى نمو خلايا جديدة صحية. تقشير البشرة اسبوعياً مهم. ممكن تستخدمى سكرب طبيعى من السكر او القهوة و ممكن تستخدمى ماسك زى ماسك الجيلاتين او تستخدمى chemical peel مع اشراف دكتور جلدية.

٦. التمرين: احرصى انك تتمرنى على الأقل 3 مرات اسبوعياً. التمرين بيحسن من الدورة الدموية للجسم. هتلاحظى فرق شاسع فى صحتك، ده غير انه بيحسن مزاجك اللى بيأثر هو كمان على مظهرك.

٧. قللى السكر و الملح: الأتنين بيساعدوا الجسم على الأحتفاظ بالمياه الزيادة و السموم فى الجسم. و استبدليهم بأكل غنى باوميجا-3 و مضادات للأكسدة اللى بتحسن من لون البشرة و تعالج مشاكلها. ركزى مع السالمون، الشاى الأخضر و الرمان.

٨. ابعدى عن المواد الكيميائية: اللى موجودة بزيادة فى كل حاجة بنستخدمها، حتى منظفات البشرة اللى المفروض تنقى من المواد الكيميائية دى اصلاً! دورى على بدائل طبيعية او و انتى بتشترى بصى على المكونات و ابعدى عن اللى فيه مكونات كيميائية كتير.

٩. الحرارة: احرصى انك تستخدمى مياه فاترة طول الوقت، صيف و شتا. المياه السخنة بتشيل طبقة الزيوت الطبيعية اللى بتكونها البشرة و بتسيبها جافة، و المياه الساقعة بتنشف طبقة الزيوت دى و بتوقعها من على البشرة برضه. نفس الشئ يتطبق على الشعر. و عشان كده فى الأيام اللى بتبقى برد او حر اوى لازم تركزى اكتر من شرب المياه و ترطيب جسمك بالكريمات و الماسكات.

Stay beautiful