Categories
في المراية

٨ ماسكات هتمنع تساقط الشعر

تساقط الشعر بقى مشكلة عامة مؤخراً. المعدل الصحى لتساقط الشعر فى اليوم حوالى 100 شعراية. اكتر من كده يبقى هتحتاجى تاخدى خطوة. الشعر بيأثر عليه عوامل كتير ممكن تخليه يضعف و يتساقط، زى التغذية الغير سليمة، المشاكل العضوية زى لخبطة الهرمونات، التوتر، مشاكل الشعر نفسها زى القشرة، التعرض للاتربة و الشمس و المواد الكيميائية العنيفة فى الشامبوهات و هكذا.

نصيحتى، متستنيش لحد ما شعرك يبدأ يقع بكثافة. احرصى انك تعملى ماسك كل اسبوع او اسبوعين لشعرك عشان تديله شوية تغذية اضافية. حاولى تقللي من المواد الكيميائية و العوامل اللى بتأثر على شعرك. ٨ ماسكات اهم، كلهم من مكونات طبيعية، اختارى اللى يعجبك بقى.

١. ماسك زيت الزيتون و زيت جوز الهند

الزيوت من اكتر الحاجات اللى بترطب الشعر و بتوفر معاها تغذية كمان. ده إلى جانب الطبقة الخفيفة اللى بتفضل على الشعر بتحميه من التكسُر و الاتربة و بتخليه يلمع.

2 معلقة كبيرة زيت جوز الهند + 1 معلقة كبيرة زيت زيتون

قلبيهم مع بعض لحد ما يختلطوا تماماً. ابدأى من الجذور للأطراف مع مساچ خفيف لفروة الراس. سيبيه ساعة قبل ما تشطفيه بمياه دافية و شامبو لطيف.

٢. صفار البيض و الشاى الأخضر

البيض مليان مواد مغذية، بروتين و فيتامينات أ و ب و د و هـ. البيض بيقلل من القشرة و بيزود من قدرة فروة الراس على امتصاص الاكسجين و بالتالى بيحسن الدورة الدموية  و يقلل التساقط. الشاى الاخضر مليان بمضادات الاكسدة فبيساهم فى تعزيز المغذيات اللى بيوفرها البيض.

صفار بيضة + 2 معلقة صغيرة شاى اخضر بودر

اضربى المكونات بالمضرب اليدوى لحد ما الصفار يبقى كريمى. حطى الخليط على فروة الراس و الشعر كله. سيبيه نص ساعة و بعدين اشطفيه بأسقع مياه ممكن تستحمليها مع شامبو للأطفال. الماسك ده ممكن تكرريه لحد 3 مرات فى الأسبوع.

٣.العسل

غَنى عن التعريف اكيد. مش بس هيقلل التساقط، هيوفر تغذية و ترطيب ملهاش مثيل. العسل كمان بينقى البشرة، هينضف فروة الراس مع كل استعمال و ينقيها من استخدام المواد الكيميائية اللى فى الكريمات و الشامبو.

1 معلقة كبيرة عسل + صفار بيضة + كبسولة فيتامين أ + كبسولة فيتامين هـ + معلقة صغيرة زيت خروع

الفيتامينات هتلاقيها فى الصيدلية بسهولة، اتأكدى بس انها فى صورة زيت مش بودرة.

اخلطى المكونات كلها مع بعض و اتأكدى ان الزيوت اتخلطت كويس. وزعى الماسك على الشعر كله من الجذور للأطراف. غطى شعرك بفوطة دافية لمدة ساعة. اغسلى الزيادة بمياه ساقعة و شامبو اطفال.

٤.الأفوكادو

موجود فى السوبرماركت الكبيرة متقلقيش. الماسك ده بالأخص للشعر الى بيقع من الجفاف و التكسر. الافوكادو هيرطب و يعالج خشونة الشعر.

1 افوكادو متوسطة مستوية + 1 معلقة كبيرة عسل + 2 معلقة كبيرة زيت زيتون

اهرسى الأفوكادو كويس بالشوكة و اخلطى معاها بقية المكونات. قلبي المكونات مع بعض لحد ما الماسك يبقى كريمى. حطيه على الشعر و سيبيه 20 دقيقة. اشطفى شعرك بمياه فاترة و ممكن تغسلى بشامبو للأطفال.

٥.الزبادى و البيض و المايونيز

اتكلمنا عن البيض، الزبادى بقى هينضف فروة الراس و الشعر و يدخل probiotics مغذية. المايونيز مرطب لأن مكون من زيوت و بيض، هيطرى الشعر بجد.

¼ كوباية زبادى + ¼ كوباية مايونيز + بيضة

اضربى البيض لحد ما يختلط تمام و بعدين ضيفي له بقية المكونات. وزعى الماسك على فروة الراس و الشعر كله. غطى راسك بغطاء الدش البلاستك و سيبيه ساعة. اشطفيه بأسقع مياه ممكن تستحمليها و شامبو للأطفال.

٦.الآلو فيرا

هتلاقى جل الآلو فيرا موجود فى الصيدليات او من امتنان او نفرتارى. هاتى انقى حاجة ممكن تلاقيها. بيطرّى و ينعم و يغذى. لأنه مستخرج من الصبار فيساعد ان فروة الراس تحتفظ بالتغذية لأطول فترة ممكنة.

2 معلقة كبيرة جل آلو فيرا + 2 معلقة كبيرة عسل

قلبى العسل و الآلو فيرا كويس. وزعى الماسك على فروة الراس و الشعر كله. غطى راسك بغطاء الدش البلاستك و سيبيه ساعتين. اشطفيه بمياه دافية و شامبو للأطفال.

٧.القهوة

القهوة غنية بمضادات الأكسدة و الكافيين اللى هيشجعوا الدورة الدموية و يقللوا من التساقط.

¼ كوب قهوة + بياض بيضة

ممكن تحضرى القهوة من القهوة سريعة التحضير و لكن الأحسن تحضريها من قهوة طازة مطحونة. اغليها و سيبيها تبرد تماماً قبل ما تضيفي لها بياض البيضة. قلبى كويس لحد ما يمتزجوا و وزعيه على فروة الراس و الشعر كله. اعملى مساج خفيف لشعرك كمان. سيبيه نص ساعة و بعدين اغسلى شعرك بمياه ساقعة.

٨.فيتامين E

فيتامين هـ من اكتر الحاجات اللى بأنصح بيها لعلاج البشرة و الشعر عن تجربة. مرطب قوى جداً، الترطيب هيقلل من العوامل اللى بتضعف الشعر و تخليه يقع زى التكسر و التعرض للشمس لفترات طويلة. ده الى جانب التغذية اللى بيوفرها.

3 كبسولات فيتامين هـ + معلقة كبيرة من خليط الزيوت اللى تفضليها او موجودة عندك، احنا بننصح بزيت اللوز الحلو، زيت الزيتون، زيت الجوجوبا و زيت جوز الهند.

3 نقط من كل نوع زيت كافية جداً. قلبى الزيوت مع بعضها و اعملى بيها مساچ لفروة الراس لمدة عشر دقايق. حركة دائرية لطيفة بدون عنف او شد للشعر. سيبيه على الشعر اطول فترة ممكنة، ممكن تنامى بيه، متطوليش عن 8 ساعات. اغسليه بمياه فاترة و شامبو للأطفال.

Leave a Reply