Categories
مع العيال

٧ حاجات هتتغير تماماً بعد ما يبقى عندك طفل

بعد شهور استوعبت حاجات كتيرة. معظم اللى الناس بتقولهولك بيبقى سلبى، مش هتنامى، انسى السينما و الخروج، سافروا و قضوا وقت اكتر سوا و بلا بلا بلا.. اللى اكتشفته العكس، لازم تتأقلمى مع الوضع الجديد، زى ما تأقلمتى مع خروجك من بيت اهلك لبيتك و حياتك المستقلة. كل فترة فى حياتك مختلفة، متحاوليش تفرضى عليها نظام مش مناسب لظروفك. هقولك ايه اللى اتغير عشان تركزى معاه.

١. هتفهمى الفرق بين التربية و التعليم و رعاية الطفل: بصراحة مكنتش مركزة مع القصة دى. بس كنت جايبة لبنتى كتب من و انا حامل لسه و بنقرأ سوا 3 او 4 ايام فى الأسبوع من اول يوم رجعنا فيه البيت. بس على الشهر السادس لاحظت انها بدأت تمل من الكتب و اللعب اللى عندها. بدأت تطلب انها تلعب و تعيط عشان مش عايزة تنام. بقت عايزة تقلدنا و تاكل و تشرب معانا. اكتشفت ان كل اللى كنت بأعمله كان مجرد رعاية. اكل و شرب و غيار و نوم و شوية تسلية و خلاص كدة. بدأت اركز مع اللعب اللى بتعلمها حاجة جديدة و اللعب اللى فيها تحدى و تشغل دماغها و هى بتلعب. و اراعى اهتماماتها و الحاجات اللى بتحبها. بنتى مثلاً بتحب الموسيقى و الأصوات عامة. يبقى اللعب و التعليم عن طريق الأغانى. فيه اطفال تانية بتبقى مهتمة بالحركة او الألوان و هكذا. و عشان هى صغيرة اوى مكملتش سنة بدأت بوضع قواعد التربية زى انى اشرح لها ليه بنعمل كل حاجة و مش بأخليها تعمل حاجة غصب عنها و بأحسسها بحب و اهتمام اهلها.

٢. هتنظمى يومك: مش هيبقى بالمسطرة اكيد بس هتلاقى يومك بدأ ياخد نظام معين بناء على احتياجات الطفل و البيت و انتى كمان. لو يومك ماشى كده و خلاص انصحك تجربى تنظميه و لو حتى انك تقولى فترة النهار كلها للبيبي لأنه بيبقى عنده استعداد اكبر يتعلم. نص اليوم للبيت تحضرى فيه الأكل و تنجزى اللى وراكى فى البيت خاصة ان معظم الأطفال بتفرهد و تنام فى الوقت ده. و بالليل ده وقت ليكى و لجوزك لما يروح.

٣. نظرتك للدنيا هتتغير: هتفهمى كلام كتير مامتك و باباكى كانوا بيقولوه. هتفهمى ليه صاحباتك اللى عندهم اطفال عمالين يبوسوا فى عيالهم طول اليوم. لو مش بتحبى الأطفال اصلاً هتبدأى تتعاطفى مع اى طفل بيعيط و تتفرجى على فيديوهات الأطفال اللى بدأت تحتل التيملاين بتاعك على الفيسبوك. و كل ما البيبي هيكبر كل ما هتشوفى الدنيا من خلاله. انبهار اول مرة يشوف قطة و الأسئلة الخزعبلية اللى ملهاش اجابات.

٤. هتخرجوا على مزاجه: مش حاجة وحشة على فكرة. انتى كنتى كده كده بتجهزى فى ساعة. دلوقتى بتجهزى فى ساعة و نص. حلها بسيط. خلى شنطة البيبي دايما جاهزة. فيها البامبرز و الغيار النضيف و حضرى بس الأكل. ركزى انك تلبسي البيبي حاجة حلوة كده و تدلعوا نفسكوا. صحيح مش هتعرفوا تسهروا بره، بس كلها كام شهر و يبكبر و يستقل و تقدرى تسيبيه مع حد و تعملى اللى انتى عايزاه. دلوقتى استمتعى بصحبته.

٥. هتدورى على صحابك اللى اختفوا: ده شئ طبيعي ان علاقتك بأصحابك اللى عندهم اطفال هتبقى تدريجياً اقوى. اولاُ لأن هيبقى عندك مليون سؤال و هتبقى عايزة تاخدى رأى حد غير مامتك و اختك و حماتك ان كان صوت الكحة ده عادى و لا مقلق. هتبقى عايزة حد يستحمل الحكايات اللى مبتخلصش عن انواع البامبرز و الوجبات و السترولر و اللى و اللى.. ده طبعا غير ان الامهات بتكوّن مناعة و بيبقى عندها استعداد تقعد تتكلم على الأطفال طول اليوم.

٦. هتقفى مع نفسك: هتراجعى شوية حاجات فى اللايفستايل بتاعك. هتفكرى انك محتاجة نظام صحى اكتر، تركزى مع الخضار و الفاكهة عشان تبقى مثال لأبنك. هتراجعى مواعيد نومك الملخبطة و الأماكن اللى بتخرجى فيها و هتفكرى قبل ما تسافرى اى حتة الجو هيبقى مناسب للبيبي ولا لأ. حاجة انا عمرى ما كنت بفكر فيها. السخنة فى الشتا حلوة؟ يالا نطلع! دلوقتى بفتح اونلاين اذاكر التوقعات الجوية للسنة قبل ما اتحرك من مكانى.

٧. علاقتك بجوزك هتتغير: فجأة هيبقى فيه حد وسطكوا، 24 ساعة 7 ايام فى الأسبوع، و بتحبوه جداً. بس برضه، جوازكوا و علاقتكوا ببعض مهمة. هنا هييجى التغيير. المجهود اللى هتبدأوا تعملوه عشان تعرفوا تتكلموا مع بعض شوية او حتى محاولات انكوا تشغلوا البيبي على ما تتناقشوا فى موضوع مهم. هيبقى مجهود انكوا تحافظوا على علاقتكم و سعادتكم. بس المجهود ده هو اللى بيقوى بيوت كتير او بيكسرها. احرصوا ان يبقى عندكم date night تقضوا فيه حبة وقت تتواصلوا فيه بعيد عن اى ضغوط. وقت مخصص ليكوا تشتغلوا فيه على نفسكوا و بس.

1 reply on “٧ حاجات هتتغير تماماً بعد ما يبقى عندك طفل”

Leave a Reply

Your email address will not be published. Required fields are marked *