Categories
في المراية

٧ حاجات ممكن تعمليهم بفرشة الماسكرا

الماسكرا دى عشق لوحدها. انا جت عليا فترة و كنت بأجمع الماسكرا كأنها هواية. طب دلوقتى بعد ما تخلص، ممكن تعيدي تدويرها برضه. حلاوة فرش الماسكارا ان سنونها بتبقى ماسكة نفسها و بتحافظ على شكلها. و عشان كثافة السنون اقل بتبقى اخف من فرشة السنان كمان. ابدأى بأنك تغسلى الفرشة كويس بمياه دافية و شامبو اطفال لحد ما تتخلصى من بقايا الماسكارا اللى عليها تماماً. سيبيها تنشف طول الليل فى مكان فيه تهوية كويسة و جربى بقى.

 

١. ممكن تسرحى بيها حواجبك: تحديد الحواجب و رسمها بقى اساسى لأى مكياج دلوقتى. حتى مع المكياج الطبيعى للصبح، تسريح الحواجب مع جل شفاف عشان تحافظ على شكلها بيفرق بجد. فرشة الماسكرا تقريباً مفيش فرق بينها و بين فرشة الحواجب. ممكن تستخدمى معاها نقطة فازلين كمثبت للحواجب بدل الجل.

٢. افركى بيها شفايفك: مش هتحتاجى سكرب مخصوص ولا حتى تعملى سكرب السكر. شوية زيت زيتون او زبدة جوز الهند على شفايفك و تفركى بيها براحة. ممكن كمان تستعملى مرطب الشفايف اللى بتستعمليه كل يوم. اهم حاجة تفركى بيها براحة لمجرد انك تشيلي الطبقة الميتة من الجلد.

٣. تظبطى بيها الصبغة: لو انتى من المحترفين اللى بيصبغوا فى البيت او حتى بتروحى للكوافير ممكن تظبطى الجذور بفرشة الماسكارا. عشان الفرشة مش بتشيل صبغة كتير زى فرشة الصبغة او فرشة السنان هى مثالية انك تعملى بيها جذور الشعر بس لحد ما يبقى عندك وقت تصبغيه.

٤. تسيطرى على الهياشان: خاصة المنطقة اللى عند الجبهة و انتى رافعة شعرك ديل حصان و تلاقى البيبي هير طالعينلك زي شعاع الشمس. بيبقى منظر جميل اوى الصراحة. رشة سبراى مثبت على فرشة الماسكارا و امسحيها بس على الشعر الهايش ده. هيثبت طول اليوم.

٥. تنضفى ضوافرك: بدل ما تستخدمى 500 حاجة، قلم و مبرد و ادوات عجيبة. هاتى اى مرطب انتى بتحبيه و ادعكى بيه ضوافرك. الفرشة هتقوم بالواجب، هتنضف الضوافر من فوق و تحت و هتشيل الجلد الميت اللى حواليها. دلوقتى ممكن تحطى المانيكور على نضافة.

٦. تدلعى المانيكور: بدل ما توجعى دماغك و تقعدى تدورى على اقلام و فرش المانيكور جربى تصنعيها من فرش الماسكارا اللى عندك. السن بتاع الفرش دى بيبقى عادة مدبب انك تقدرى تستعمليه كانه دوتينج توول تعملى بيه نقط بسيطة و الفرشة نفسها ممكن تعمل اشكال مختلفة. جربى تقصى اجزاء منها و ترسمى بيها.

٧. بعد كل ده ممكن تنضفى بيها: آه، الحاجات البسيطة اللى التراب بيتسرب لها، زى الكيبورد، الريموت، كفر الموبايل. و الفرش دى كمان ممتازة انك تفركى بيها المجوهرات و انتى بتغسليها.