Categories
في البيت

٥ طرق طبيعية تخلى ريحة بيتك تجنن

صيف شتا بقينا مقفلين البيت. بنفتح نهوّى شوية و ندخل حبة شمس و خلاص. فى الصيف مستخبيين فى التكييف و فى الشتا بردانين و بندفى البيت. الكتمة او قلة التهوية ممكن تخلى الروائح تفضل فى البيت، زى ريحة الطبخ، لو حد مدخن زاركم او من الحيوانات الأليفة. ٥ طرق طبيعية و مناسبة جداً لو عندك أطفال او حساسية و خايفة من استخدام معطرات كيميائية.

 

البرتقال و القرفة

احلى حاجة فى الطريقة دى انها بتستعمل مواد موجودة فى البيت و مش محتاجة تشتريها مخصوص. خاصة فى الشتا لما بيبقى عندنا برتقال كتير و بنبقى مقفلين البيت جامد عشان البرد. ببساطة هاتى حلة صغيرة فيها كوبايتين مياه و حطى فيها قشر برتقال، برتقالتين اقل حاجة و معاهم عود قرفة او معلقة كبيرة بودرة قرفة و سيبيهم يغلوا على النار لحد ما ريحتهم تنتشر فى البيت. ممكن تزودى المياه حسب كمية البرتقال، اهم حاجة ان القشر كله المياه تغطيه عشان ميتحرقش.

 

روح الفانيليا

هتلاقيها عند اى عطار. الطريقة دى فيها شوية مجهود. حطى معلقة كبيرة من روح الفانيليا على كوباية مياه و امسحى بيها الأرضيات. اهم حاجة انك تجيبى منتجات اصلية و خالية من السكر.

 

النعناع

من عند العطار ممكن تجيبي روح النعناع او زيت النعناع، ريحته قوية جداً و منعشة بجد بالأخص فى الصيف. على قطنة كبيرة حطى كام نقطة من النعناع و علقيها عند فتحة خروج الهوا فى المكنسة. الهوا اللى خارج من المكنسة أحياناً بيسيب ريحة تراب فى الأوضة. بس بالطريقة دى هتستفيدى من الهوا ده و الحرارة بتاعته فى نشر ريحة النعناع.

 

ريحة الغسيل الجميلة

كلنا بنحب ريحة الغسيل اللى لسه خارج طازة من الغسالة. ممكن تستمتعى بالريحة دى فى اى اوضة. فى بخاخة صغيرة حطى 1/8 كوب منعم ملابس و معلقة كبيرة بيكربونات صودا (بيكينج صودا) و كملى بقية الأزازة مياه. رجيها كويس و اتأكدى ان البيكربونات دابت تماماً. رشى الخليط ده على الستاير و المفروشات. ممكن تستغنى عن البيكربونات بس انا بحب احطها لأنها بتقتل الجراثيم و بتمتص الروائح السيئة.

 

باكيت الروائح الطبيعية

اصنعى باكيتات صغيرة من اى قماش بيدخل الهوا زى الكتان او التل. اسهل طريقة لصنع الباكيت بدل من الخياطة انك تقصى مستطيل و تلزقى الجوانب بمسدس شمع. املى الأكياس بالروايح اللى بتحبيها. زى الورود المجففة او قطنة مبلولة بأى برفان او زيوت عطرية طبيعية بتحبيها. احلى حاجة فى الباكيتس دى انك ممكن تغيري محتوياتها براحتك و تخبيها فى اى ركن من الأوضة.

 

اخبزى!

عارفة انى قلت خمسة. بس دى طريقتى المفضلة، صحيح مبتطولش زى الباقيين بس.. كيك؟! اخبزى حلويات طبعاً! الوصفة سهلة جداً و ريحة خبز الحلويات متتعوضش. البيت هيبقى ريحتة تجنن و انتى و الأولاد هتاكلوا كيك و تتبسطوا.