Categories
في المطبخ

٥ طرق تفطرى بيها شوفان الصبح بدون مجهود

انا و بنتى بنحب الشوفان جداً. بغض النظر عن فوايده الكتير، هو اكتر حاجة بأحس انها بتمدنى بالطاقة طول النهار. المشكلة انى مش بأحب اصحى اقف قدام البوتجاز اعمل فطار. عشان كده بأحضر الشوفان من بالليل بطريقة من دول. فطار صحى (نوعاً ما) مفيد و سريع! 

شوفان كلاسيك بالفانيليا

الوصفة دى هى الأساس. 

فى علبة محكمة الغلق اخلطى كوب شوفان مع كوب لبن و معلقة صغيرة فانيليا سائلة، لو تحبى. 

سيبيها تبات فى التلاجة على الأقل 8 ساعات. 

شوفان بالشوكولاتة

فى الكوباية اللى هتعملى فيها الشوفان اخلطى معلقة كبيرة كاكاو و معلقة صغيرة عسل مع معلقة صغيرة لبن. امزجى الخليط ده لحد ما تتأكدى ان الكاكاو داب تماماً. 

مع التقليب المستمر ضيفي كوب لبن لخليط الكاكاو. 

دلوقتى ضيفي كوب شوفان و قلبيه بخفة. 

8 ساعات فى التلاجة و يبقى جاهز للفطار.

شوفان بالشيا و الموز

حبوب الشيا بقت متوفرة بسهولة فى الفترة الأخيرة، فى السوبرماركت الكبيرة و من ابو عوف او امتنان. 

زى الشوفان الكلاسيك، كوب شوفان و كوب لبن و معلقة صغيرة فانيليا، نقلبهم. 

ضيفي لهم 2 معلقة صغيرة شيا و موزة مقطعة. 

الشيا لها طعم شبيه بالكاكاو الخام، مع الموز بتبقى خطيرة. 

ممكن تضيفي عسل لو حابة، مع ان الموز بيسكّر الخليط جداً. 

مش اقل من 4 ساعات فى التلاجة عشان الشيا تكون جاهزة. 

شوفان بالمكسرات و زبدة الفول السودانى

انصح بمكسرات مش محمصة او مملحة عشان تستفيدى منها بدون الكالوريز الزيادة. الأفضل، لوز مقشور، كاجو مطحون خشن او فواكه مجففة. الكمية فى حدود معلقة كبيرة. 

فى الخلاط اضربى كوب لبن مع معلقة صغيرة زبدة فول سودانى. اتأكدى ان زبدة الفول سودانى دابت تماماً فى اللبن. 

ضيفي اللبن لكوب الشوفان و عليهم المكسرات. 

بالهنا و الشفا الصبح.

شوفان بالفاكهة

هتعملى نفس خليط الشوفان الكلاسيك و تضيفي عليه اى فواكه انتى تحبيها. 

خدعة كمان انا بأعملها للخليط ده. كوب فراولة مغسولة و مجففة و بأضربها مع نص كمية اللبن و بعدين اضيفها للخليط. 

8 ساعات و تفطرى بيه. 

Leave a Reply