Categories
في المراية

٣ طرق طبيعية تتخلصى بيها من الرؤوس السودا

أكيد كلنا بنكرهها و عارفين شكلها بس هى بتيجى ليه؟ سببها الأساسى هو ان المسام بتحوش الزيوت الزيادة و المكياج و عليهم الأتربة طول اليوم و بتتسد. ممكن تطلع لأى نوع من البشرة بس هتلاحظيها اكتر فى المناطق الدهنية. بتحتاج شوية عناية بس ممكن تتخلصى منها تماماً و تتعلمى ازاى تبعديها عنك. هى مش مضرة و مش بتسبب مشاكل صحية بس احنا بنحب نهتم بنفسنا شوية.

 

التقشير الخفيف Exfoliation 

طبعاً بيشيل كل الجلد الميت و بينعش المسام. لو عملتيه بالفيتامينات هيغذى كمان. مع حركة صوابعك هتشجعى الدورة الدموية و هتلاحظى الفرق مباشرة. طبعا فيه مليون طريقة و مستحضر بس الطرق الطبيعية اخف و افيد للبشرة. جمعى المكونات و قلبيها بخفة، هنعتمد كتير على السكر، متخليهوش يدوب لأن هو اللى هيقوم بدور الفرك. جربى واحد من التلاتة سكرب دول.

3 معلقة كبيرة سكر + 1 معلقة زيت زيتون + معلقة عسل

او

2 معلقة كبيرة سكر + 1 معلقة زيت زيتون + 1 معلقة عصير ليمون

او

2 معلقة كبيرة سكر بنى + 1 كبسولة فيتامين E + 1 معلقة عسل

 

البخار

دى طريقة سهلة و اعتقد كلنا جربناها. الغلطة اللى معظمنا بيعملوها انه بعد البخار بتمسحى وشك و خلاص كدة. معملتيش حاجة على فكرة! ممكن تستبدلى البخار بفوطة او قطنة مبلولة بمياه سخنة شوية. الهدف هو فتح المسام. حطى الفوطة على بشرتك لحد ما تحسى ان الحرارة اتنقلت للبشرة. خليكى مجهزة قطنة عليها نقطة مياه ورد او Tea Tree Oil. و ابتدى تزقى المسام من تحت لفوق. عشان تساعديها انها تطلع اى حاجة مدفونة جواها. لو عملتى البخار صح. الخطوة التانية مش هتحتاج منك مجهود. انا بنصح بالتى ترى اويل عن تجربة.

 

الماسك

وظيفته شبه التقشير. ميزته الأساسيه انه بيتغلغل فى المسام و بينضف من العمق. فيه ماسكات كتير بتتباع. دورى على المخصص للرؤوس السودا لأن هو ده اللى هيشلهم فعلاً و حاولى تبعدى عن اللى مليانين مواد كيميائية كتير عشان متتعبش بشرتك. ممكن تعملى ماسكات كمان فى البيت بسهولة. هتبتدى بباكيت جيلاتين، ده اساسى لأنه هو اللى هيخلى الماسك يثبت. و ممكن تغيري المكونات حسب احتياجات بشرتك. انا بحب الأتنين دول.

1 باكت جيلاتين (حوالى معلقة كبيرة) + 1 معلقة عسل + 1 معلقة لبن + 5 لـ8 نقط تى ترى حسب ما انتى عايزة قوة الماسك. قلبى كله مع بعضه و سخنيه فى المايكروويف 10 ثوانى او تدفيه على النار عشان الجيلاتين يشتغل و يبقى كريمى. سيبيه ينشف على الوجه لمدة 20 – 25 دقيقة قبل ما تشيليه. و اغسلى وشك بالمياه بس بعده. ممكن تستبدلى التى ترى اويل بمياه ورد. الماسك ده عنيف شوية و انتى بتشيليه لأنه بجد بيشد الجلد معاه و هو بيسحب الأوساخ من المسام.

او

1 باكت جيلاتين + 2 – 3 معالق لبن. قلبيه لحد ما يبقى عامل زى معجون الأسنان و سخنيه فى الميكروويف 10 ثوانى. حطى طبقة خفيفة منه حوالين الأنف او المناطق اللى فيها الرؤوس السودا. سيبيه لمدة 15 دقيقة لحد ما ينشف تماما و تحسيه شد بشرتك. شيليه و اغسلى وشك بعده.

 

ازاى تمنعى رجوعها تانى؟

 

• استخدمى المنتجات المناسبة: خاصة فى المناطق اللى بتعانى فيها من الرؤوس السودا. منطقة الأنف و الجبهة. حاولى تبعدى عن المنتجات اللى غنية بالزيوت عشان متسدش المسام. حاولى كمان تستعملى منتجات فيها خاصية “ضد البكتريا”. هتساعدك كتير و هتنضف بعمق اكبر.

• الترطيب: كل ما تهتمى بيه هيبعد عنك مشاكل الجلد الميت. اللى ممكن يسد المسام فى المنطقة اللى حواليه.

• المكياچ: لو منضفتيهوش كويس جداً بتفضل آثاره فى البشرة. و احنا هدفنا الأساسى ان المسام تفضل مفتوحة. متنسيش تشيلي المكياچ كله قبل النوم.

• و طبعاً مرة اسبوعياً تعملى ماسك او سكرب عشان تحافظى على نضافة المسام.