Categories
في البيت

٣ طرق تنضفى بيها الميكروويف

انا بنضف الميكروويف مرة كل أسبوع. و بصراحة عشان بيبقى ورايا حاجات تانية كتير فى البيت معنديش وقت اقعد ادعك و اتخانق معاه. طرق كتير هتقولك تستخدمى خل، هتلاحظى انى مش هستعمله خالص. بينضف آه، لكن بيسيب ريحة فى الميكروويف و هتنتشر فى المطبخ كله كل ما هتشغليه. ممكن تستعملى فوط تلميع صغيرة او مناديل مطبخ. انا بأفضل مناديل المطبخ لأنها بتمتص الدهون اكتر و بتخلصى و ترميها.

اول طريقة

هتجيبي طبق غويط ممكن يدخل الميكروويف و تملي نصه مياه و تشغلى الميكرووف لمدة 3 دقايق. خليكي مستعدة بالمناديل و اول ما المدة تخلص امسحى الميكروويف من جوه كويس. الميزة الأساسية للطريقة دى انها طبيعية و مش هتدخلى اى مواد كيميائية فى الميكروويف. البخار اللى هيطلع من المياه هيدوب الدهون و الأوساخ و انتى عليكي بس انك تمسحيها. حسب قوة الميكروويف ممكن تحتاجى تزودى الوقت عشان بخار المياه يطلع.

تانى طريقة

للدهون الصعبة، هتستعملى المنظف اللى بتستخدميه فى المطبخ. انا بستعمل ديتول منظف المطابخ. متستخدميش كتير. بللى المناديل او الفوطة اللى هتستخدميها بس. و امسحى بيها المكروويف من جوه. بعدها امسحيه تانى بفوطة مبلولة خفيف بمياه عشان تشيلى آثار المنظف. سيبي باب الميكروويف مفتوح 15 دقيقة عشان ينشف تماماً قبل ما تستعمليه.

آخر طريقة

مش للتنضيف فعلاً بس عشان الروائح اللى بتفضل فى الميكرووف. هتستعملى طريقة التنضيف الأولى و هتضيفى فى المياه نص ليمونة او نص معلقة صغيرة باكينج صودا (بيكربونات صودا). الأتنين بيمتصوا الروائح السيئة. الليمون بيسيب كمان ريحة جميلة.

طبعاً نضافة الميكروويف من بره مهمة برضه. متنسيش بعد ما تخلصى من جوه تمسحيه بفوطة تلميع من بره كويس.عشان تحافظى على الميكروويف نضيف من الأسبوع للأسبوع لازم تستعملى غطاء الميكروويف للأطباق مع كل الحاجات اللى هتسخنيها.