Categories
في البيت

٣ طرق تنضفى بيها الكيتل

مكنتش متخيلة قد ايه انا معتمدة علي الكيتل لحد ما حصل لها مشكلة و قعدت قرب الشهر من غير كيتل خالص! للمشروبات الصبح و بالليل، مياه مغلية للطبخ، مياه مغلية لتنضيف الحلل و لتعقيم ادوات اكل الاطفال.
جبت واحدة جديدة بقي. طيب أحافظ عليها ازاى و أنا بستخدمها طول اليوم، تخلص و املاها، تخلص و املاها تانى. خصوصاً أن المياه فيها رواسب و أنا عايزاها تعيش معايا بنفس الأداء زى أول ما اشتريتها.

الخل
أحسن و أضمن طريقة أمان جداً هى الخل. الخل الأبيض العادى اللى بنستخدمه فى الأكل.
هنملي كوب نصه مياه و نصه خل. عايزين كمية متساوية من المياه و الخل.
ندلق المياه بالخل في الكيتل و نملي باقي الكيتل مياه للماكس، و نشغله يغلي عادي جداً.
نسيب الكيتل يبرد خالص قبل ما نيجي جنبه تاني. حوالي ساعة.
ممكن دلوقتي نبلل فوطة مطبخ بشوية من المياه اللي في الكيتل و نديله تلميعه سريعة من برة.
ندلق نص المياه من الكيتل و بفرشة الازايز نمسحه سريعاً عشان نتأكد ان كل رواسب المياه طلعت.
مش محتاج تدعكي جامد. و لو لقيتيه محتاج دعك يبقي تزودي المياه و تغليه تاني.
خلاص بقي نضيف و متأكدين انه بيلمع من جوه.
نفضيه و نملاه بقي مياه بس و نسيبه يغلي. دي دورة تنضيف سريعة عشان تشيل ريحة الخل.

الليمون
نستفيد بقي من قشر الليمون بدل ما يترمي.
نملي ٣/٤ الكيتل مياه و نعصر فيه عصير ليمونة كبيرة او ليمونتين صغيرين و نزود عليهم قشر الليمون كمان.
و ممكن تستخدمي قشر الليمون مباشرة. بس عصير الليمون تأثيره اكبر.
شغلي الكيتل يغلي و سيبيه يغلي و يبرد.
بعد حوالي ساعة، ادلقي المياه بالليمون من الكيتل و رشي جواه بيكربونات صودا. مش هيحتاج دعك. امسحيه بس بسفنجة عشان تتأكدي ان كل الرواسب طلعت.
دلوقتي بقي نشطف الكيتل كويس و نملاه مياه تاني و نغليها. يعني نعمل دورة تنضيف عشان نشيل اي روائح من الليمون او البيكربونات.

ملح الليمون
نملى الكيتل مياه لحد نصفها تقريباً بعد ماتغلى و تطفى نحط معلقتين كبار ملح ليمون.
نسيب المياه مع ملح الليمون فى الكيتل تقريباً 20 دقيقة.
هنا هندلق المياه كلها. و نجيب سفنجة مطبخ ناعمة و نمسح الكيتل من جوه كويس عشان نتأكد ان كل الرواسب طلعت.
خلي بالك علي ايديكي ممكن يكون الكيتل لسه دافي من جوه.
و بعدين نعمل دورة تنضيف. مياه بس و نغليها و ندلقها.

الكيتل بقي فلة!

نصايح مهمة بقي عشان الكيتل يفضل شغال بكامل كفائته:

  • احسن طريقة لتلميع الكيتل من بره هي نقطة زيت علي فوطة مطبخ نضيفة و تمسحي بيها الكيتل و بعدين تنشفيه من اي زيت زيادة. هيفضل يلمع كأنه جديد لاكتر من اسبوع.
  • عملية ازالة رواسب المياه من الكيتل دي لازم تتعمل مرة كل شهر. ببساطة لأن الرواسب بتتنقل للمياه اللي بنشربها و لأنها بتطول من وقت غليان المياه و بالتالي بتأثر علي كفائة الكيتل و بتقلل عمره.
  • متسيبيش مياه زيادة في الكيتل. هي دي اكتر حاجة بتعمل رواسب. عشان انا بستخدمه كتير فعلا و صعب ان افضيه كل مرة باحرص انه يبات فاضي علي الاقل. مع روتين ترويق المطبخ بالليل بافضي الكيتل تماماً.
  • ابعدي الكيتل عن اي شباك او مصدر للأتربة في مطبخك. عايزين نحافظ عليه نضيف بره و جوه و نشرب منه مياه نضيفة.

Leave a Reply