Categories
مع العيال

١٨ طريقة تخففى بيها آلام التسنين

البتاع الصغير اللى كان لسه مش عارف يعيط ده بيطلّع سنان! حاجة جميلة بالنسبة ليكي، لأن ده معناه ان النمو ماشى تمام و ممكن نغير و ننوّع فى قوام الأكل. مش هنعتمد على المهروس و المسلوق 100% خلاص. بس الطفل الغلبان ده الموضوع مش سهل عليه. دكتور السنان بيوصف خروج الأسنان بأنها بتفتح اللثة و تطلع.

هتلاحظى شوية علامات كده يأكدوا ان فيه سنان بتشق طريقها للنور. لعاب كتير و ريالة مغرقة الدنيا، عياط و عض و زن بدون سبب، اللثة هتحسى انها وارمة شوية و حساسة، بعض الأطفال بيفقدوا شهيتهم، و فى حالات قليلة ممكن يظهر التهاب حفاض او حرارة الجسم تعلى. مش لازم كل الأعراض تظهر لطفلك و ممكن تتفاجئى بسنتين بدون اعراض قوية و واضحة.

 

ممكن تهونى على الطفل وجع اللثة بطريقة من دول:

١. مساچ خفيف بصباعك: يا سلام لو الصباع مبلول مياه ساقعة. ممكن تتعضى، سيبيه يطلع شوية من الألم اللى حاسه بالضغط على ايدك.

٢. خيار: سقعى الخيارة فى التلاجة. قشريها و اديها للطفل كاملة او قطع كبيرة صعب انه يأكلها مرة واحدة، لازم يعضعض فيها. الطريقة دى للأطفال فوق عمر الـ6 شهور.

٣. فوطة ساقعة: تكون نضيفة و تبلليها خفيف بمياه ساقعة و سيبيها للطفل يعض و يشدها ببقه.

٤. فرشة الأسنان: دورها هيبتدى بدرى شوية. احرصى انها تكون ناعمة و سيبيها تعمل الباقى.

٥. عضاضة بلاستك: من اقدم الطرق. ننصح بالأخص انك تجربى العضاضات اللى بتبقى مليانه مياه، بتبقى فيها مقاومة اخف للثة و كمان ممكن تسقعيها.

٦. آيس كريم: مناسب لكل الأعمار. ممكن تجمدى شوية من لبن الأم او اللبن الصناعى فى علبة محكمة. عشان الطفل يعرف يمسكها ممكن تستخدمى معلقة بلاستك، امان اكتر من العصيان الخشب.

٧. ببرونة ساقعة: ممكن تجمدى شوية مياه فى ببرونة. حطى الببرونة فى الفريزر بالمقلوب عشان المياه تتجمد عند الحلمة.

٨. الرضاعة: الحل السحرى للعياط و لمعظم اعراض التسنين. لكن للأسف مع بعض الأطفال ممكن متبقاش مريحة. راقبى طفلك و قررى بنفسك.

٩. المعلقة: الطريقة دى بتنصح بيها جمعية أطباء الأسنان الأمريكية. معلقة صغيرة ستانلس ستيل او خشب نضيفة، تسقعيها فى التلاجة لـ4 ساعات قبل ما تديها للطفل.

١٠. التيتينة او السكاتة: المرة دى بقى هتبقى مختلفة. اضغطى على الحلمة و غطسى التيتينة فى مياه شرب و بعدين سيبي الحلمة تدريجياً و التيتينة لسه تحت المياه. هتلاحظى انها اتملت مياه من جوه. هايل. جمديها الأول قبل ما تديها للبيبي. هتحتاجى بافتة معاها عشان المياه هتنقط منها مع العض.

١١. الـMesh Feeder:دى اختراع. مع الم التسنين ممكن تحطى جواها بطيخ او عنب ساقع.

١٢. اصنعى چل طبيعى: مش بننصح بأستخدام الجل الطبى من الصيدلية لأن كله مواد كيميائية. اعملى چل سريع بخلط 2 قرنفل مطحون مع معلقة صغيرة زيت جوز الهند و 1/4 معلقة صغيرة من الجنزبيل المبشور و معلقة صغيرة من مياه الكاموميل المغلى. بصباعك امسحى طبقة خفيفة على لثة طفلك.

١٣. العسل: للأطفال من عمر السنة، ادهنى طبقة من العسل على اللثة. من خصائص العسل انه مضاد للألتهاب، هيهدى من الورم.

١٤. الارز: املى كيس قطنى بمعلقتين كبار رز نى و حطيه فى الفريزر يسقع. بللى الكيس قبل ما تديه للطفل. حركة الارز هتعمل مساچ للثة و الحرارة الساقعة هتوفر راحة.

١٥. قطعة عيش: طبعاً حسب عمر الطفل، مش قبل 9 شهور. ممكن ياخد قطعة عيش يمضغ فيها، هتريح شوية من احساس الألم.

١٦. بسكوت التسنين السريع: عايزاه يبقى ناشف شوية و اكيد لازم تراقبى الطفل و هو بياكله. موزة مهروسة + 1/2 كوب شوفان مطحون. قلبيهم كويس و على الفرن 15 لـ20 دقيقة.

١٧. سلسلة التسنين القطن: قطعة قماش طويلة، تعملى فيها كلها عقد صغيرة و تلبسيها للطفل. لازم تبقى واسعة جداً عليه، طولها يوصل للبطن. يبقى تحت مراقبتك و يلبسها و هو قاعد.

١٨. شتتي انتباهه: لما العياط و الوجع يزيد حاولى تشغليه بأى حاجة عن الألم. دش سريع، زغزغة، اخرجوا اتمشوا او شغلوا اغانيكوا المفضلة و ساعديه يتعلم حركات رقص جديدة.