Categories
9 شهور Featured

١٥ حاجة محدش هيقولهالك عن الحمل

هجيبلك من الآخر عشان متقوليش محدش قاللى. اهم حاجة تبعدى عن شغل الدراما كوين و تستعدى للى جاى. لأنه فيه الحلو و الوحش. ركزى على الحلو عشان متتعبيش. و خدى الحمل على انه تحدى انتى اقوى منه!

 

١. شعرك و ضوافرك هيبقوا اقوى و هيطولوا بسرعة: عشان هتمشى على فيتامينات كتير هتوفرلك التغذية المثالية و عشان هرمونات الحمل بتحفز نمو و صحة الشعر و الضوافر.

٢. الوحم مش ثابت طول الحمل: ممكن تتوحمى على حاجة جديدة كل شهر. جوزك غالبا هيعانى مع الموضوع ده و انتى مش هتبقى فاهمة انتى عايزة تاكلى بطاطس محمرة الساعة 3 الفجر ليه!

٣. مش لازم تاكلى لأتنين عشان البيبي بيحتاج 300 كالورى زيادة بس. لكن لو انتى عايزة تدلعى كلى لأتنين براحتك و متحرميش نفسك.

٤. معدتك هتتفعص و بسببها هيجيلك غازات و حموضة. انا بحاول انى اقسم الوجبات الكبيرة على جزئين عشان ابعد عن الحموضة عدوتى. بس بصراحة بعد الشهر السادس بقت بتجيلي فى جميع الأحوال و اتعلمت اعيش معاها. سببها ان الرحم كل ما بيكبر بيزق كل اللى حواليه و معدتك بيبقى ليها مساحة صغيرة عشان تتوسع فيها بعد الأكل و تبتدى الهضم مش عشان البيبي هيتولد بشعر و الكلام الجميل ده.

٥. الغثيان مش فى اول 3 شهور بس. الغثيان ممكن يمشى فى الشهر التانى و يرجع فى السادس. بيحب المفاجأت. خليكي مستعدة بالبسكوت المالح و متستسلميش.

٦. الأرهاق و الأستعجال دونت ميكس: الأرهاق من اول اعراض الحمل. بيخف شوية فى التلت التانى بس بيرجع تانى و بعنف. العيب انه بيرجع فى الوقت اللى انتى بتبقى عايزة توضبى فيه اوضة البيبي، تجهزى شنطتك و تغسلى هدوم البيبي كلها. متستعجليش عشان هتوترى نفسك على الفاضى. ابتدى بدرى و حاولى تعملى حاجة كل يوم. هتخلصى قبل الولادة.

٧. هتزهقى. هتبقى متحمسة اوى فى الأول، بعدين الحماس هيروح و هتبقى عايزة تشوفى البيبي و ضهرك يبطل يوجعك.

٨. متنسيش نفسك – لازم تهتمى بنفسك برضه: وسط كل ده ممكن تنسى انك تجيبى لنفسك حاجة او تهتمى بنفسك. هتبقى ام صحيح بس انتى لسه نفس الشخص. متحوليش فكرة انك هتبقى ام لأنك تتحولى لشخص تانى.

٩. ايام هتنسى انك حامل اصلاً: ده حقيقي. حتى لو فى الشهر التاسع. هتحسى ان بطنك مش موجودة و البيبي هيبقى طيب و هيسيبك تستمتعى بكام ساعة لوحدك. فى الأيام دى كمان غالباَ هيجيلك شوية طاقة زيادة، استغليهم لأقصى الحدود.

١٠. مش كل يوم هيبقى يومك: العكس بقى. ايام مش هتبقى عايزة تقومى من السرير. مش عيانة. بس كسل فظيع و نوم مبيخلصش. نامى و اشبعى نوم. ممكن يكون جسمك محتاج راحة.

١١. حاجات كتير هتوحشك بس مش هيفرق معاكى اوى: الأكل و الأنشطة الممنوعة منها كانت بتوحشنى اوى فى الأول بس مع دخول الشهر السادس بقيت بحس انى اصلاً معنديش طاقة للمغامرات و ان احلى حاجة هى انى اقعد و ايدي على بطنى و استنى البيبي يخبطلى.

١٢. هتعيطى بدون سبب او بسبب. هتعيطى و السلام. ده حقيقي. على الأفلام، على الطبخة اللى باظت، عشان شوفتى صورة بيبي حلو او حتى بدون سبب خالص. الهرمونات دى حاجة عجيبة.

١٣. الرحلات الكتير للتواليت مش هتبقى كل يوم. فيه ايام البيبي هينام فوق المثانة و هيبقى نفسك يقوم. و ايام هتبقى زى البنى آدمين الطبيعيين. السر فى الأيام الوحشة ان تستنى المثانة تشاور عقلها كمان مرة قبل ما تخرجى من التواليت.

١٤. تدريبات النوم هتبتدى. بمجرد ما تحسى بخبطات البيبي هيبتدى يدربك على النوم المتقطع و هيصحيكي معاه. ايام هتنامى و البارتى شغالة فى بطنك و ايام هتاخدى خبطة هتصحيكي مفزوعة.

١٥. الشهر التاسع ده بايخ! هيطول و هتبقى خلاص على آخرك عايزة البيبي ده ييجى بقى و هتستنى الدكتور يحددلك معاد بفارغ الصبر.