Categories
في المراية

١٤ استخدام لزيت الأطفال ملهاش علاقة بالأطفال

كلنا عندنا ازازة زيت الأطفال مركونة من السنة للسنة و مش عارفين نعمل بيها ايه، و ده لأن بصراحة نقطة واحدة منها ليها مفعول كبير فبالتالى بيعيش عندنا كتير. بالرغم من أن اسمه زيت أطفال الا إنك هتتفاجئي بأستخداماته اللى مش اطفال خالص.

 

١. مزيل للمكياچ خصوصاً مكياچ العيون.

٢. ادهنيه حوالين ضوافرك قبل ما تحطى مانيكيور هيمنع ان المانيكور يتحط على الجلد.

٣. حطى منه على الشاور چل بتاعك هيبقى نضافة و نعومة.

٤. حطيه على كعوب الرجلين كل يوم قبل النوم خصوصاً فى الشتا مش هتلاقى تشققات تانى.

٥. استخدميه و انتى حامل أو وقت الريجيم و الرياضة عشان تمنعى ظهور السترتش ماركس او الخطوط البيضاء.

٦. بعد الحموم و جسمك لسه مندى بالمياه ادهنى الزيت على جسمك كله خصوصاً الأماكن الخشنة.

٧. أحسن مرطب يهدى الجلد بعد ازالة الشعر اياً كانت الطريقة.

٨. سكرب سريع للجسم و الوش: اخلطى شوية سكر مع زيت الاطفال و دلكى بيهم جسمك قبل الحموم هتلاقى بشرتك صفيت جداً.

٩. استخدميه كزيت للمساچ و تدليك الجسم و انسى التوتر و أوفر من كل زيوت المساچ.

١٠. لو عايزة تشيلى بلاستر من غير مايوجع إيدك و انتى بتشيليه و لا يسيب علامة، ادهنيه بزيت الطفال و سيبيه دقيقة و هتلاحظى انه بيتشال بسهولة.

١١. لو سوستة شنطتك معاكسة معاكى و مش عايزة تتقفل جربى تدهنيها بشوية زيت أطفال هتلاقيها اشتغلت أحسن.

١٢. لو عايزة تقلعى خاتم و لقيتيه ماسك على صباعك، حطى كمية محترمة من زيت الطفال و هتلاقيه بيتقلع بسهولة.

١٣. المرة الجاية اللى ابنك يلزق فيها لبانة فى شعره أرجوكى متقصيهوش. جربى تفركى شوية زيت فى شعره. المفروض أن الزيت هيعمل طبقة حوالين اللبانة و يساعدك تشيليها بس بعدها متنسيش تغسلى شعره بسرعة.

١٤. لو مش عايزة تعملى اى حاجة من دى نضفى بيه الصالون! هاتى قماشة نضيفة و بليها بسيط بالزيت و امسحى بيها الخشب هيرجع يلمع و زى ما كان جديد.

Leave a Reply

Your email address will not be published. Required fields are marked *