Categories
في البيت

١١ طريقة تظبطي بيها امورك المالية

ازاي تبدأي تنظمي فلوسك، و تتحكمي فيها. بدل ما بتلاقي نفسك آخر الشهر محفظتك فاضية و مش عارفة حتي الفلوس راحت فين.

انا كنت تايهة و مش عارفة ابدأ منين و جربت كذا نظام لتنظيم المرتب و عشان يساعدني اصرف احسن. ممكن نتكلم عن كل نظام بعدين بس دلوقتي هنتكلم عن الاساسيات اللي لازم تبدأي تعودي نفسك عليها حتي من قبل ما تبدأي اي نظام توفير او تحويش فلوس. ازاي تبدأي بداية نضيفة عشان الموضوع يبقي سهل و متفشليش من اول محاولة.

هاتي ورقة و قلم او افتحي جدول الميزانية اللي احنا عملناه من هنا (Excel) و ابدأي فكري معايا.

ممكن تطبعي جدول الميزانية PDF بسهولة من هنا.

١. خلصي ديونك قبل اي حاجة
اكتبي اي فلوس مفروض تدفعيها شهرياً. بعيداً عن الفواتير. قروض او كريدت كارد او اي اقساط. كل المديونيات الكبيرة دي. زيارة او مكالمة للبنك و اعرفي عليكي كام بالظبط و انتي بتدفعي كام شهرياً، باقي لك مدة قد ايه في الاقساط و لو دفعتي بدري هتبقي وفرتي قد ايه. كل دي اسئلة مهم يبقي عندك اجابتها.
القروض باشكالها مصممة انها تدخل للبنك فلوس، يعني انتي بتخسري فلوس. حتي لو الاقساط صغيرة فأنتي بتخسري فلوس شهرياً.
دلوقتي فكري في طريقة اسرع تخلصي بيها من ديونك. لو عندك كريدت كارد مثلاً باقي فيها الف جنيه، اقرصي علي نفسك شهر و ادفعيهم مرة واحدة بدل ما تدفعي ٣٠٠ جنيه علي ٤ شهور.
التخلص من الديون كمان هيحسسك ان مرتبك بقي اكبر لأن الفلوس دي انتي فعلاً كأنك مش بتقبضيها.
ده بغض النظر عن ان الحاجة اللي انتي اشترتيها دي بعد مدة قيمتها بتقل، حتي لو هتفكري في بيعها هتخسري جزء كبير من الفوس اللي دفعتيها.
و عن تجربة متحاوليش تحوشي طول ما انتي عليكي فلوس لأن ببساطة رصيدك بالسالب، التحويش اللي انتي بتعمليه ده مش بيضيف اوي. الاحسن انه يتحول لسد المديونيات.

٢. قسمي الميزانيات
دلوقتي بقي تفكري في كل مصروفاتك. الفواتير اللي بتدفع شهرياً، العربية او المواصلات، مصروف البيت، كل اللي بيخطر علي بالك. و قسميهم لمجموعات.

انا عندي ٥ مجموعات اساسية.
١. مصروفات شخصية
٢. فواتير او مصاريف ثابتة
٣. تسديد المديونيات
٤. مدخرات
٥. مصروفات مرة واحدة

و تحتهم باحط ميزانية لكل مجموعة. المصروفات تحتها مصروف شخصي لينا و للاولاد. مصروف البيت ده بقي السوبرماركت و اي حاجة عايزين نشتريها للبيت. اما الخروج في الويك اند بنعمل له ميزانية منفصلة. الفواتير تحتها الايجار، المياه، الكهربا و الغاز. دفع المديونيات تحته خطة بنطبقها عشان يبقي معندناش ديون في خلال الشهور الجاية. و مصروفات المرة الواحدة دي مصاريف مش بتتكرر زي بنتي عايزة تشتري عجلة، فيه عيد ميلاد او مناسبة و هكذا. مدخرات دي بنحط فيها فلوس لاهداف صغيرة زي مثلا سفرية حلوة في الصيف، مصاريف المدرسة و كل المصروفات الكبيرة اللي ممكن نقسم فلوسها علي مدة طويلة بدل ما ندفعها مرة واحدة و تبوظ ميزانية شهر او اتنين. انا مع الوقت كمان بدأت افصل العربية عن باقي الميزانية و احط لها خطة منفصلة لأني بقيت مع الوقت ببقي عارفة مواعيد الصيانة و استهالاك البنزين.

٣. اكتبي اللي بتصرفيه أول بأول و خدي الفواتير
عارفة انها مهمة صعبة جداً، بس بجد بتفرق اوي مع الوقت. انا بدأت الاول اني بجمع الفواتير، اي حتة بروحها لازم آخد فاتورة.، و آخر الاسبوع ادخل الفواتير كلها. تدريجياً بقي الموضوع اسهل، بقيت كل يومين او تلاتة ادخل الفواتير، لأن لما بيتجمعوا بتبقي المهمة اصعب.

٤. ارجعي لمصروفات الشهر اللي فات و اتعلمي منها و خليكي واقعية
دلوقتي بقي هناخد كل المصروفات دي و ندخلها تحت المجموعات اللي عملناها. اعرفي انتي بتصرفي كام في الشهر علي كل بند. هتتفاجئي، ده اكيد! انا عمري ما كنت اتخيل اني بصرف كل ده علي الاكل في الشغل! ده كمان هيخليكي تبقي واقعية و انتي بتعملي ميزانية الشهر الجديد. مش منطقي انك بتصرفي ٥٠٠ج علي بند في الشهر و تحطي له ميزانية ١٠٠ج بس. الاوقع انك تفكري في طرق للتوفير و تظبطي الميزانية الجديدة بين اللي بتصرفيه فعلاً و اللي انتي ناوية توفريه.

٥. اعملي كروت، جمعي نقط
الكروت اللي بتجمعي بيها نقاط في اغلب الاماكن بتكون مجانية، مش هتخسري حاجة، لكن مع الوقت ممكن تكسبي من العروض او تقدري تشتري بالنقاط دي.

٦. وفري وقت ما تقدري
معظم الوقت الواحد بيفكر في التوفير، بس لازم تبقي برضه منطقية. انا دايماً بأختار الجودة بدل الكمية. يعني مش منطقي اشتري ١٠٠٠ كيس سندويتشات بس نوع بلاستك رخيص و انا في الشهر بستخدم ١٠٠ بس. يبقي الشهر ده اشتري ال١٠٠ بس يبقي نوع صحي و ممكن اعيد استخدامه كمان و مع تحسن الميزانية ممكن ابقي اشتري كمية اكبر في عرض و اوفر علي المدي البعيد.
التوفير كمان بشطارتك في انك تقللي من الاكل بره، خدي ايام راحة من الاكل بس خليها ايام محددة في الاسبوع. لحد ما تتعودي علي المطبخ اكتر.
تابعي عروض السوبرماركتس و المحلات و ركزي مع الحاجات اللي عايزة تشتريها. دوري اونلاين كمان، ممكن تلاقي deal احسن.
وفري في الكهربا بأنك تغيري للمبات ليد موفرة و طبعاً تطفي و تفصلي اي اجهزة مش بتستخدميها عن الكهربا.
فكري في طرق للتوفير، بس بدون حرمان. لأن ده اول حاجة هتبوظ خططك.
اعرفي من هنا ازاي توفري في ميزانية السوبرماركت.
و من هنا ازاي توفري في مصروف البيت.

٧. فكري في البدائل
ارجعي للفواتير. هل انتي بتستخدمي الpackages بتاعتك كلها؟ مش منطقي تدفعي اشتراك الباكدج الكبيرة و انتي بتستهلكي اقل من الباكدج الصغيرة.
طب اشتراك قنوات التليفزيون ده مناسب ليكوا؟ الانترنت؟
دوري علي بدائل، لكن مش اقل، من المنتجات اللي بتشتريها. انا مثلاً بدلت كل المواد الكيميائية اللي كنت بشتريها في المنظفات بخل و بيكينج صودا. صحية اكتر و موفرة اكتر بكتير من كل المواد الكيميائية اللي بتأذي الجلد و الصحة.

٨. اشتري علي قد ما هتحتاجي
اشتري كل حاجة علي قد احتياجاتك. زي ما قلنا مثال اكياس السندويتشات فوق. طبقي النظام ده علي الخضار و الفاكهة و كل المأكولات بالاخص. و طبقيه علي استهلاك الانترنت زي ما قلنا في رقم ٧.
اي حاجة انتي بترميها في آخر الشهر دي فلوس مهدرة.

٩. اعملي شوبينج في دولابك و مطبخك
قومي اعملي شوبينج في دولابك. شوفي الهدوم و الجزم و كل الحاجات اللي مركونة في قاع الدولاب دي. فكري كده، لو لقيتيها في محل النهاردة ممكن تشتريها؟ لأ؟ يبقي بيعيها او تصدقي بيها.
راجعي مطبخك، شوفي الاكل اللي متخرن بقاله فترة و اعملي منه اكلة و وفري في ميزانية الشهر ده.
بصي علي لعب الاطفال.
كل اللي ملوش لازمة لازم يمشي. ممكن تبيعيه و بنفس الفلوس تجيبي حاجة احسن، و هتستخدميها فعلاً.

١٠. اعادة الاستخدام
اعادة الاستخدام من اكتر الطرق اللي فرقت معايا فعلاً في التوفير. و بتديني احساس جميل كده اني بعمل حاجة تفيد الكوكب كله مش نفسي بس.
وفري في المياه باعادة استخدامها، يعني المياه اللي بتبقي في البانيو ممكن تستخدميها بعد كده تسقي الزرع. البرطمانات الكتير اللي بتترمي او تتركن،اعرفى زى تعقميها و تعيدي استخدامها من هنا. القميص بتاع جوزك اللى مبقاش مقاسه قصى الكمام و استعمليها أو البسيه تحت أى حاجة شفافة. كل حاجة قبل ما تترمي بفكر، هل ممكن استفيد بيها بشكل تاني او اعيد تدويرها.

١١. خططي
اعملي منيو للاسبوع او للشهر،. اعرفي انتي نازلة تشتري ايه.
اعملي ليست بالحاجات اللي دولابك محتاجها.
ليست تانية بالحاجة اللي عايزة تجيبيها للبيت.
اعرفي هتشتري ايه الشهر ده و سعره كام. متنزليش المول من غير خطة، هتشتري المول كله و انتي مروحة.

و متنسيش انك ست شاطرة اصلا انك وصلتي للموضوع ده و بتحاولي فعلا تحسن من اوضاعك المالية.

Leave a Reply