Categories
مع العيال

١١ حاجة متعملوهاش قدام ولادكم

حاجات كتير بنعملها بتلقائية و من غير مانفكر كتير قبل مانتكلم أو نتصرف فى مواقف مختلفة. حاجات مش واخدين بالنا منها و فاكرينها عادى هتعدي على ولادنا و مش هياخدوا بالهم بس الحقيقة و الواقع غير كده! هما فاهمين كل حاجة و فاهمين كويس أوى كمان. عايزين ناخد وقفة مع نفسنا و نركز على اخطائنا احنا الأول قبل مانعاقب و نعايب على أولادنا.

  1. متمسكيش التليفون و تنمى على قرايبك و صحابك و حماتك قدام الولاد عشان هيقلدوكى و مش بعيد ينموا عليكى مع أى حد. بالنسبة لهم الموضوع هيبقى عادى بس هيفضحوكى! و عشان من الأساس، النميمة غلط. 
  2. بلاش نتنرفز و نشتم طول اليوم و نحذر الأب كمان، خصوصاً فترة سواقة العربية و الأولاد معانا عشان بعد شوية هتلاقيهم ريحوكي و بقوا يشتموا بدالك و ابقي اعرفي لميهم ساعتها!
  3. متتخانقيش مع جوزك أبداً أبداً قدام ولادكوا. ليكوا اوضة خاصة تقفلوا بابها و تعملوا اللى نفسكوا فيه. و لو مجرد بتنبهى جوزك لحاجة بسيطة خليها من تحت لتحت.
  4. مش لازم احم احم نعبر عن مشاعرنا و احاسيسنا الداخلية قدام الولاد. هو آه حضن،  وحشتينى و بوسة يومية الصبح ده شئ أساسى و صحى، لابد منه عشان الولاد يحسوا بحبكم. بس أكتر من كده نخش نفس الاوضة بتاعة الخناق و الكلام ده يتطبق من و الطفل عنده يوم، هو فاهم على فكرة. 
  5. ماتبقيش سامعة الآذان و متقوميش تصلى و بعد كده تتخانقى مع ولادك انهم مبيصلوش.
  6. بلاش نشتكى منهم علي طول مع الناس أو حتى نشتكى  من مصاريف المدرسة. هى الحياة فعلاً صعبة بس الطفل مش بيحب يحس انه عبئ تقيل على اهله.
  7. لو عايزة ولادك يبقوا رياضيين متوديهمش التمرين وأنتي تقعدي تاكلي شاورمة بره. العبي أى رياضة و لو حتى تتمشي فى التراك و حسسيهم أن أنتي مستمتعة بالرياضة زيهم مش تأدية واجب و خلاص.
  8. لما نرجع من الشغل مش لازم نكمل يومنا فى كلام عن الشغل و اللى حصل و اللى اتصل (المفروض منردش). نسيب الشغل بكل همومه على باب البيت و نفصل شوية مع العيلة بشوية ضحك و لعب وأكلة حلوة نتلم حواليها.
  9. لو أنتي قاعدة فى ماكدونالدز دلوقتى و طالبة كومبو لارج و بتبلعي بالبيبسى أكيد ولادك مش هيطلعوا بيحبوا الخضار و الفاكهة. لما تحبي انتي الأكل الصحى الأول وتأكليه و أنتي مستمتعة، ولادك هيحبوه و ينسوا العك.
  10. متشتريش اى حاجة و كل حاجة ملهاش لازمة و تزعلي لما يشبَطوا فى حاجة و يصروا يشتروها!
  11. سيبي الموبايل أو التابلت من ايدك الأول و بعدين ابقي ازعلي من ولادك اللى مبقتيش تعرفي تتكلمي معاهم عشان وشهم علطول فى الموبايل.

الأعتدال كويس ولادك هما مرايتك كل حاجة بتعمليها فى نفسك هتشوفيها فيهم. يبقى تغيري من نفسك الأول قبل ماتطلبي منهم التغيير.

و فى المقابل، وجودك برضه مهم، بلاش تبعدى انتى او الأب فترات طويلة عن الأطفال. هم بيحتاجوا رعاية و مثال يحتذوا بيه.

Leave a Reply