Categories
9 شهور

١٠ حاجات هتساعدك علىِ النوم و انتى حامل

“أكتر جمل بتسمعيها و أنتى حامل: “نامى كتير، الحقى نامي شوية، انتى مش هتشوفى النوم ده بعد كده أو خدى راحتك فى النوم و نامى على قد ماتقدرى.”
بس أنتى طبعاً و لا عارفة تنامى و لا تستفيدى بالفترة دى من التعب و تقل الجسم و النوم فى حد ذاته ممكن يبقى انجاز. أنا كست حامل نفسى أنام بس قولوا لى كلام مفيد.. أنام ازاى!

بعيداً عن كلام الستات، فيه حقيقة علمية بتقول أن حوالي 70 % من الستات مش بيناموا كويس أثناء الحمل، يعنى اتطمنى انتى طبيعية. بس برضه فيه 30% بيناموا كويس و نفسِك تبقي منهم.

مبدئياً كده، ايه هى المشاكل اللى بتمنعنا من النوم؟

فى أول 3 شهور، هرمونات الحمل هتبدأ تشتغل.هتحسي بأرهاق و هتلاقى نفسك طول النهار نايمة و ده هيأثر علي نومك بالليل. هرمونات الحمل هتخلي عضلاتك ترتخي و بالتالي جسمك هيبتدى يوجعك. التغيير فى هرموناتك كمان هيطلع عليكى فى مشاعرك، شوية قلقانة و زعلانة و شوية فرحانة و بتعيطى، و بتفكري في البيبي طول الوقت.

فى التلت التاني غالباً هتحسى بوجع فى المعدة و امساك و هيزيد على بالليل و ده بيحصل بسبب ان الجسم بينتج هرمون اسمه البروجيسترون، الهرمون ده بيرخى العضلات بما فيهم عضلة المرئ المسئولة عن وصول الأكل و الأحماض للمعدة و حركة الأمعاء و الهضم. عشان نتجنب الوجع ده، تقسمى أكلك على وجبات صغيرة على مدار اليوم و تتجنبى الأكل التقيل و السبايسى. نفس الهرمون بيسبب احتقان فى الأنف و ده طبعاً بيظهر وقت النوم. و كمان حوامل كتير في الفترة دي بيبدأوا يجيلهم بالليل احلام غريبة، بسبب لخبطة الهرمونات و قلة النوم.

فى آخر 3 شهور، طبعاً قربتي علي الولادة و وزن الحمل الطبيعي هيكون هو اكبر مشاكلك. مع الشكوي العامة من انك مش لاقية وضع نوم مريح. هتعملي رحلات بقى طول الليل للحمام، خصوصاً فى وجود بيبى لذيذ مريّح على المثانة.

طبعاً كل ست حملها مختلف عن التانية، لكن كلنا عايزين نخفف من المشاكل دى أو نمنع حدوثها من الأول. جربي النصايح دى بقي:

  • امنعى الكافيين و السكر: و كافيين هنا مقصود بيها القهوة و الشكولاتة و الكولا و كل المنتجات اللى بتحتوى على كافيين.
  • خدى كفايتك من السوايل على مدار اليوم و خففى منها على الليل. مش معناه انك تنامي عطشانة عشان تقللي من الرحلات للتواليت، لكن تركزي مع شرب العصاير و اللبن و السوائل الإضافية خلال فترة النهار. و تشربي مياه كويس ليل و نهار.
  • خدى عشاء خفيف بالليل قبل ماتنامى زى ساندويتش جبنة و زبادي أو خضروات و فاكهة فريش. بلاش الأكلات التقيلة و الحراقة أو الحادقة أوى اللى ممكن تسبب حرقان فى المعدة.
  • جربى تاخدى دش دافئ بالليل قبل دخول السرير فوراً، هيساعدك على الإسترخاء و النوم أسرع.
  • اظبطى درجة حرارة الغرفة اللى هتنامى فيها الأول و ابعدى عن السخونة و الحر لأن جسمك غالباً هتكون درجة حرارتة عالية عن الطبيعى.
  • اسمعى موسيقى هادية و حاولى تفصلى شوية من الدنيا و انسى انك حامل، هتلاقى أعصابك هديت و جسمك استرخى كتير.
  • خففى الأضاءه بدرى شوية عن ميعاد نومك بحيث عقلك الباطن يبتدى يترجم وقت النوم.
  • فيه مبدأ تانى ناس كتير بتنصح بيه و هو انك تطلعى طاقتك كلها فى حاجة بتحبيها و تكون سهل تعمليها و انتى حامل؛ زى الرسم و التلوين. حتى لو مش بتعرفى تعمليهم بنفسك زيي، فيه كتب تلوين جاهزة دلوقتى للكبار مسلية جدا،ً ممكن تجيبيها مع علب الوان و انطلقى.
  • القراءه و الكتابة هما أصدقائك : اقرائى عن الأطفال و تربيتهم و هاتى نوتة صغيرة سجلى فيها نقط استفدتيها من الكتاب و مش عايزة تنسيها.
  • و طبعاً لو انتى انسانة رياضية، الرياضة و اليوجا هما حل كل مشاكل الحامل.

ايه أفضل أوضاع للنوم؟

الأساسى هو أن مش محبب النوم على البطن أو الضهر عشان صعوبة التنفس. أفضل وضع هو على الجنب الشمال. بتشتغل الدورة الدموية أحسن و الدم يوصل للجسم كله فيقل الورم اللى بنصحي نلاقيه خصوصاً فى الرجلين. أحب أطمنك، لو وضعية نومك مش مريحة للطفل هيديكى شالوت يصحيكى تعدلى نفسك.

و علي عكس الأسطورة اللي بتقول ان عشان الحامل تتقلب من الجنب اليمين للجنب الشمال لازم تقومي تقعدي عشان الحركة متبقاش مؤذية ليكي او للجنين، اتقلبي زي ما تحبي. الأساس في الأسطورة دي ان الحركة اصلاً بتبقي صعبة شوية، انا كنت بتقلب عادي بس كان لازم امسك في راس السرير عشان اعدل نفسى.

كلمة السر هى المخدة، الشئ الطرى الجميل اللى بياخد شكل الجسم ده هو صديق الأم الحامل. ممكن تحطيها بين رجليكى عند منطقة الركبة، هتساعد أن أفخادك تبقى فى شكل متساوى و تقلل من وجع الضهر. ممكن تحضنيها و تبقي ساندة دراعك كله عليها ده هيخلى الرقبة و الكتاف فى وضع مستقيم و مريح. انا كنت بأستخدم اكتر من مخدة وقت النوم. اهم حاجة انك تستخدمى المخدات انها تدعم جسمك و تخفف شوية من وزن الحمل اللي بيبقي ضاغط علي الأعصاب. فيه طبعا أشكال و أنواع كتير و مقاسات مختلفة.

أشهر نوع هو المقاس الكبير جداً و دى بتبقى مقاس الجسم كله، بتعمل Support بتسند الجسم كله و تريحه من الرأس للرجلين. هتلاقي منها شكلين، علي شكل هلال و فيه علي شكل حرف U. الأتنين بيبقوا متوفرين في محلات مستلزمات الأطفال.

فيه الأنواع المخصصة لجزء معين من الجسم زى الرقبة أو الضهر. و فيه مخدة بتستخدميها للنوم و بعد كده بتبقى مخدة رضاعة.

و ممكن تستغنى عن كل ده بمخدة فايبر عادية جداً و طرية جداً تفردى و تتنى فيها براحتك و موجودة فى كل مكان.

من الخدع اللي اتعلمتها وقت الحمل، ان افرد بطانية رفيعة تحت رجلي، او عند منطقة القدم. ده من الحلول السحرية اللي خففت عني ورم الرجلين في الفترة الأخيرة من الحمل. عشان البطانية مغطية مساحة كبيرة كنت بنام بالليل احسن بدون ما اقلق اعدل المخدة اللي تحت رجلي كل شوية.

نص ساعة قبل النوم، تقفلي الموبايل و التليفزيون و تدخلي في موود الأسترخاء. علي الكومود جنبك، ممكن تولعي شمعة معطرة او تحطي عود او اي روائح ممكن تساعدك تسترخي. كتابك و مزيكتك و جنبهم كوباية مياه كبيرة و سناك. تصبحي علي خير.