Categories
مع العيال

١٠ حاجات ممكن تعمليها و انتى محبوسة تحت البيبي

بنتى قعدت اول 6 شهور مش بتنام غير على كتفى. اول ما احطها فى سريرها تصحى. فى الأول بتبقى مبسوطة ان البيبي متطمن على كتفك و عايز ينام فى حضنك. بس بعد شوية بتبدأى تزهقى. خاصة لو هتقعدى كده فترة. تعملى ايه طيب؟

 

١. نضفى الموبايل: مش قصدى من برة. و لو انه ميضرش برضه. بس بدل ما المساحة اللى عندك محدودة و انتى بتبقى عايزة تصورى البيبي طول اليوم، فضى شوية مساحة. ابدأى بالأبليكيشنز اللى مش بتستخدميها. امسحى السكرين شوتس اللى ملهاش لزمة و الصور المهزوزة. لو بتعملى باك آب اول بأول يبقى امسحى اللى على الكلاود او الكمبيوتر.

٢. اعملى ليست: انا بحب الـLists جداً. النظام حلو مفيش كلام و بيسهل الحياة مليون مرة. ممكن تفكرى هتطبخى ايه للأسبوع كله بالمرة (عارفين انها حاجة صعبة). اكتبى طلبات السوبرماركت. شوفى فيه ايه محتاجة تصلحيه فى البيت.

٣. اقرى: اول ما تبدأ علامات النوم تظهر، قومى هاتى كتابك و مشروبك الدافى و اقرى شوية. ممكن كمان تقرى على الموبايل، مواقع كتير ممكن تلاقى عليها كتب للقراية مجانا،ً اولهم جوجل بوكس.

٤. اتعلمى حاجة جديدة: ممكن تتعلمى لغة جديدة، تعرفى ثقافة بلد، تقرى فى التاريخ، تتعلمى يوجا، فيه مليون مصدر للمعلومات اونلاين. خلى الموبايل او التابلت فى ايدك و البيبي نايم. فى 6 شهور ممكن تتعلمى حاجة مفيدة.

٥. راجعى يومك: فكرى كده فى المواقف اللى مريتي بيها مع البيبي و ايه كان ممكن تغيريه او تعمليه بطريقة احسن. راجعى طريقتك فى التربية مناسبة لطفلك و ايه ممكن تحسنيه عشان يناسب شخصيته. فكرى كمان ايه اللى البيبي اتعلمه و ايه ممكن تعلميه له.

٦. تواصلى مع العالم: افتحى الفيسبوك شوية و لا كلمى صاحبتك على الواتسآب. لو انتى من الأمهات اللى بتحاول تمنع ان ولادها يتعلقوا بالموبايل، يعنى انتى بتستخدميه فى اضيق الحدود. متنسيش تعملى الموبايل سايلنت و توطى الصوت و انتى بتتفرجى على فيديو عشان متصحيش البيبي.

٧. دلعى نفسك: هاتى الماسك اللى نفسك تحطيه ده و مش لاقية وقت. خليه بس قريب من ايدك و مراية ايد صغيرة و حطى الماسك على وشك. ممكن كمان ترطبى ايديكى، تبردى ضوافرك. حضرى اللى هتحتاجيه جنبك.

٨. العبى شوية: اللعب على الموبايل دى علاج فعلاً. بتنسيكي اى عك فى اليوم، تفضى دماغك شوية و ترجعى مفرفشة تانى لعيلتك. ممكن تلعبى حاجات بسيطة زى كاندى كراش. او تلعبى مع جوزك حاجة زى تريفيا كراك. او تبقى مدمنة بقى و تلعبى كلاش اوف كلانز.

٩. احضنى البيبي شوية: بصى له و استمتعى بوجودكم مع بعض. العبى فى شعره و طبطبى على ضهره. ادى لنفسك فرصة انك تحسى بالأمومة بجد، بعيداً عن الزن و العياط و الأكل و البامبرز. الأمومة انك بتحبى البيبي ده اكتر مما انتى و اى حد يتخيل.

١٠. نامى: غالباً البيبي كان مسهرك طول الليل، نامى بقى و اشحنى زيه عشان تقدرى تواصلى معاه.

Leave a Reply

Your email address will not be published. Required fields are marked *