Categories
9 شهور

١٠ حاجات لازم تعمليها قبل ما البيبي يوصل

خلاص، قربتى تولدى؟ لِسَّه بدرى؟ عموماً فيه وقت كفاية تعملى ال١٠ حاجات دول. إللى احنا شايفين انهم أساسيين قبل الولادة. و هيريحوكى نفسياً لشهور بعد ما تولدى.

١. نضّفى البيت: فى آخر أسابيع ليكي هتبقى حركتك تقيلة شوية و الدكتور هينصحك تبعدى عن اى مجهود. البيبي هيحتاج مكان نضيف بعيد تماماً عن الأتربة إللى ممكن تأذى رئته و تأثر على التنفس. النضافة كمان هتوفر هواء نقى فى البيت كله. ده بغض النظر ان العيلة كلها هتيجي عشان تشوف البيبى و لازم البيت يبقى شكله حلو. أكيد هتعملى الحاجات الخفيفة زى التلميع او الترويق و تسيبي الباقى لأى حد بيساعدك.

٢. أغسلى هدوم البيبى: ناس كتير ممكن تخليكي تكسلى عن الخطوة دى، لكن احنا شايفين انها مهمة جداً لصحة البيبي. الهدوم فى كل المحلات بتتعرض لأيادى كتير بتقلب فيها و حتى لو فى الاكياس، البلاستيك بيسيب اثر على نسيج الهدوم. ده غير التخزين اللى بيأثر فيها بسبب العوامل اللى بتتعرض لها من اتربة و خلافه. و متنسيش طبعاً تقصى التيكت عشان ميضايقش طفلك.

٣. اشترى اساسيات البيت: هتقضى فترة مكسلة تعملى اى مشاوير و مش هتستحملى اى مفاجأت. خزنى على مدار الشهور الاخيرة من حملك الاساسيات اللى بتحتاجيها بصفة دايمة فى البيت. مش هتبقى عايزة حتى جوزك يسيبكوا و يختفى فى السوبرماركت ساعة. و متقتصريش على المواد الغذائية فقط.

٤. دلعى نفسك: روحى للكوافير، حتى لو حاسة انك هتولدى هناك. انتى برضه عايزة يبقى شكلك حلو فى صور الولادة و صورك مع البيبي، دى ذكريات هتشيليها له. قصّى شعرك و دلعى نفسك و انسى انك حامل شوية و خففى عن نفسك الضغط و الخوف من الولادة او التفكير فى المسؤوليات. استمتعى بوقتك مع نفسك.

٥. اخرجى انتى و جوزك: لو ده اول بيبي، دى هتبقى آخر فترة تقضوها انتوا الاتنين بس. حتى بعد ما البيبي يشرّف، لو خرجتوا و سيبتوه هيبقى هو برضه كل تفكيركوا. استمتعوا بالوقت ده مع بعض و روحوا السينما و اتعشوا بره متأخر و جربوا كل الحاجات اللى مش هتعرفوا تعملوها مع طفل. حتى و لو السهر فى البيت.

٦. وضبى كل حاجة فى مكانها: نظمى الدواليب و المطبخ و كل ركن فى البيت. بعد ما البيبي هييجى النظام ده هيفيدك انك تلاقى اى حاجة بتدورى عليها بدون مجهود او توصفى لحد مكانها بسهولة. و انك بدون تفكير برضه ترجّعى الحاجة دى فى مكانها. استعيني بعلب و انظمة ترتيب الادراج و الدواليب، هتسهل المهمة.

٧. جهزى ورق الشغل و المستشفى: لو بتشتغلى، قابلى حد من شئون العاملين و اعرفى منه قوانين الاجازات و اللى ليكي و اللى عليكي. نظمى ورق اجازتك و قدميه. و اعرفى من الدكتور بتاعك برضه لو المستشفى اللى هتولدى فيها هتحتاج حجز و ايه الاوراق المطلوبة. و نسقى ما بين التأمين الصحى، لو عندك، و المستشفى.

٨. ركبى كرسى العربية و السرير: و كمان حطى شنطة المستشفى فى العربية او جنب الباب. رصّى هدوم البيبي فى الدولاب و رتبى اوضة البيبي و قضى وقت فيها. طلعى كل حاجة من علبها و جربيها. ده انسب وقت لو هتغيري حاجة او ترجعيها.

٩. ابتدى تجهيزات العقيقة او السبوع: فعلاً مش هيبقى عندك وقت تفكرى فيه انتى هتعزمى مين و ناسية حد و لا لأ و هتجيبوا الخروف منين و كل الكلام ده. شجعى جوزك يروح يحجز تجهيزات العقيقة و انتى اعملى ليست باللى هتعزميهم عشان متنسوش حد. و لو عندك وقت ممكن تنزلى تجيبي ديكورات و هدايا ليوم العقيقية.

١٠. جهزى فلوسك: البيبي مصاريفه كتير. ده طبعاً غير مصاريف المستشفى المستخبية. اشترى مستلزمات البيبي الاساسية زى الحفاضات و الكريمات عشان تخففى الضغط شوية. لكن كمان حوشى و اعملى حسابك ان اول شهر ده بيبقى كله مفاجأت.

Leave a Reply

Your email address will not be published. Required fields are marked *