Categories
في البيت

١٠ اسباب تخليكى تجيبي غسالة اطباق

سؤال لاحظت ان كل اصحابي اللى بيتجوزوا بيسألوني عليه. هي غسالة الأطباق مفيدة فعلاً و لا بلاش منها؟ ده معاد بقى اسئلة من نوعية ”بتستخدميها بجد؟ كل يوم؟ بتشغليها كام مرة فى اليوم؟ و بتنضف الاطباق؟ يعني اجيبها علي ضمانتك؟”
الأجابة ببساطة: آه، بشغلها كل يوم، ممكن اكتر من مرة عشان انا عندى اكزيما و تعرض ايدي للمياه كتير غلط عليا. مقدرش اعيش من غيرها! و آدى ١٠ اسباب انا مقتنعة ان غسالة الأطباق حيوية فى اي بيت.

١. عشان مش لازم تدعكي حلل تاني

انا بحب اطبخ، و بحب النضافة اكتر من الطبخ. ايام، الموضوع بيبقي كتير، خاصة لو فيه عزومة او طبخت اكل لكذا يوم. الحلل بتبقى هى اصعب حاجة بالنسبة لى. الدهون اللى متكومة فى اطراف الحلة، بواقى الأكل و بقع الصلصة. كل ده الغسالة هتعمله بدالك.

٢. عشان تحافظى علي ايديكي

بغض النظر عن حالتي، لأن جلدي حساس، بس غسيل الأطباق و التعرض للمياه لفترات طويلة مؤذى للجلد. ده غير اضرار صابون غسيل الأطباق و المنظفات اللى بنستخدمها. مع الوقت هتلاحظى تغيير فى لون الجلد و جفافه بعد غسل الأطباق. انصحك تستعملى جوانتي، او ترصى الأطباق فى الغسالة اول بأول.

٣. عشان تستمتعي بوقتك مع ضيوفك

بعد الأكلة الحلوة، ضيوفك هيقوموا يساعدوكي تلمي السفرة و يحولوا الأطباق على المطبخ. بدل ما يلاقوا منطقة حرب و تلاقى العزومة قلبت بأننا قاعدين فى المطبخ، تشغلى الغسالة فى ساعتها. طبعاً انتى شغلتيها قبل ما ييجوا على الحاجة اللى اتوسخت فى مرحلة الطبيخ و فضيتيها و مستعدة. دلوقتى تدخلي كل اللى هيتحول لك ده عليها و تخرجى تشربى الشاي مع ضيوفك.

٤. عشان تفضى نفسك بعد الفطار و الغدا و العشا كمان

انا عندي طفلة صغيرة و بمجرد ما اختفى من قدامها ١٠ دقايق بتبدأ المصايب، تلون على الكنبة، تتسلق المكتبة، اى شقاوة! و بصراحة، انا ببقى عايزة اريح و استمتع بوقتي مع عيلتى بعد الأكل. ده بغض النظر عن الأمهات الأبطال اللى بيبقي عندهم واجبات تتحل و متابعة مذاكرة، كده تشيلي من عليكي الحمل شوية.

٥. عشان تنضفى الكوبايات الإزار و الاطباق اللى متخزنة بدون مجهود

انا بحب كل 3 شهور افضى دواليب المطبخ و اغسلها من جوه و اغسل كل اللى جواها و ارجع كل حاجة نضيفة. البواخة بتبقى فى الكوبايات الأزاز اللى بيبقى محتاج يتنشف و يتلمع و يقرفك ٦ سنين بعد ما تغسليه. الغسالة فيها برنامج للزجاج مخصوص بيطلع ناشف و بيلمع و معليهوش علامات صوابع. و للباقى، ممكن تستخدمى برنامج شطف بس او غسلة سريعة، هتخلص فى نفس الوقت اللى تكونى لمعتى فيه الدواليب.

٦. عشان تعقمى أدوات الاكل و تحافظى علي صحتكم

ممكن تكوني شفتى فى اعلانات غسالات الأطباق او المسحوق ان درجة حرارة المياه اللى ممكن نستحملها مش كافية انها تقتل الجراثيم، لكن الغسالة ممكن تغسل على درجات اعلى بكتير و تعقم بالبخار. ده مثالى انك تعقمى بيه ادوات الأكل، بالأخص للأطفال. تعقمى القطاعات و السكاكين بعد استخدامها مع اللحوم النية. و ممكن كمان تغسلي فيها الخضروات و الفاكهة.

٧. عشان توفرى فى المياه

تصدقى ان الغسالة بتستهلك مياه اقل منك! انت فاتحة الحنفية متواصل و بتدخلى و تخرجى ايدك من تحت المياه. الغسالة بتفتح المياه و تقفلها حسب احتياجها و بتدور المياه جواها فتستخدم اقل منك. توفير فى المياه مفيد لجيبك و للبيئة.

٨. و توفري وقت

بحب انا اوى احساس ان انا سوبروومن و فى مكانين، بعمل كذا حاجة فى نفس الوقت. الأطباق بتتغسل و انا بروق بقية البيت. انسى الأطباق و آخد بنتى تلعب بره البيت شوية، اقضى وقت مع جوزى، اشتغل شوية… فيه مهمة فى اليوم ممكن انساها و استغل وقتها فى حاجة تانية.

٩. عشان تشتري دماغك

بدل ما بعد كل وجبة تقفى قدام الحوض، و تبقى خايفة من هجوم الحشرات او تكسلى تطبخى لمجرد انك مش عايزة تغسلي اطباق! غسالة الأطباق دى احسن وسيلة تشترى دماغك بيها من وجع شغل البيت الروتينى زى غسيل الأطباق. مجهود و وقت انتى اولى بيه. اتفرجى على حلقة المسلسل، اشحنى طاقة ايجابية، ريلاكس.

١٠. عشان متغسليش الببرونات و تعقميها فى نفس الوقت

للأمهات اللى بتعتمد على الببرونات و الكوبايات فى اكل الأطفال، غسيل كل ببرونات اليوم فى آخر اليوم حاجة مرهقة فعلاً. ممكن تخصصى غسلة مخصوص للبرونات بس، على اعلى حرارة. هتطلع نضيفة و معقمة و جاهزة تبتدى بيها اليوم. و انتي تنامي نص ساعة زيادة 🙂

ناس كتير ممكن تخوفك من الغسالة لأنها بتصرف فلوس كتير. “انتي شفتي الصابون بكام في السوبرماركت؟” الكلام ده مش حقيقي. علبة الصابون الواحد كيلو ممكن تعمل اكتر من 40 غسلة، يعني تعيش اكتر من شهر، حسب استخدامك و حجم غسالتك. كمان المكونات التانية اللي بتستخدمها الغسالة، ينطبق علي سعرها نفس النظرية، سواء الملح او مساعد الشطف. عن نفسي، بأستخدم نوع محلي، سعره مناسب جداً و جودته معقولة. مش هأكذب و اقول ان الصابون و الملح و مساعد الشطف حاجات رخيصة و اساسية، هي طبعاً اضافة علي ميزانية الشهر و سعرها مش قليل مقارنة بصابون غسيل الأطباق العادي. لكن هنا انتي بتتحكمي في استهلاكك و ممكن توفري بطرق كتير.

Leave a Reply