Categories
في البيت

يومِك أسهل فى البيت

لو انتي ست قاعدة فى البيت أو بتشتغلى و حاسة إن فكرة تنظيم يومك فى البيت دى صعبة و الكلمة اصلاً بتحسسك بالمسئولية الفظيعة، أو بتحسى إن اليوم بيجري من غير ما تعملى حاجة مفيدة. أنا هنا هقولك شوية أفكار تسهل عليكي يومك فى البيت و تحسسك إنك عملتى إنجاز.

• نامى بدرى و اصحى بدرى.

• لو مش هتجهزى حاجة من بالليل لتانى يوم يبقى على الأقل جهزى أفكارك عشان تبقى على الشغل علطول مش لسه هتفكرى تطبخى ايه و تغسلى ايه و تشترى ايه!

• دايما ابدائى بالحمام أول حاجة بتدخليها الصبح و انتى بتغسلى وشك تغسلى الحوض و التواليت و ترشى معطر.

• طلعى من الفريزر أى حاجة هتطبخيها تفك.

• رصى الغسالة و شغليها مع نفسها عقبال ماتلفى على البيت تلمعى الترابيزات و تروقى، شغلى المكنسة فى السريع و روقى درج واحد أو حتى رف فى الدولاب بس مش أكتر عشان متزهقيش و تستمرى كل يوم هتلاقى البيت علطول مترتب و منظم.

• اطبخي و خلصى بدرى بدرى و خلى الأكل على التسخين أو يدوب يخُش الفرن يتحمر و تعملى السلطة وقت الأكل. طبعاً لو مجهزة حاجتك، الخضار متنضف و اللحمة و الفراخ متوضبة فى الفريزر هيبقى الوضع أسهل و أسرع.

• خشى خدى دش و البسى حاجة حلوة كده و نضيفة و خصصى لنفسك وقت أساسى فى يومك لنفسك، تعملى ماسك لوشك، تعملى شعرك بالسشوار، تغيرى تسريحته او صنفرة لكعب رجلك، المهم متنسيش نفسك.

 

يعنى الخلاصة لو هما 7 ساعات شغل:

• ساعتين تنضيف و ترويق للبيت.

• ساعتين طبخ بتنضيف المطبخ بعد ماتخلصى.

• ساعة على الأنترنت و التلفزيون ممكن تتقسم على مدار اليوم.

• ساعة لنفسك تعملى قهوة و تقرأى كتاب أو تكلمى مامتك فى التليفون.

• ساعة تدلعى فيها نفسك و تهتمى بجسمك و بشرتك.