Categories
9 شهور

ينفع أعمل ريجيم و أنا برضع؟

الحمدلله عدت الولادةعلى خير و ابتدينا الرضاعة، و معاها ابتدى السهر و الجوع، و فى نفس الوقت الميزان جنب السرير و بأطلع لبسى قبل الحمل مش داخل فيا!

أفكار كتيرة و ملخبطة و التاتش المصرى بيقولك كلى حلاوة و اشربى حلبة بالسمن و العسل الأسود (من اسمها أصلاً تتخن) اعتقاداً منهم أن هو ده الأساس للرضاعة و تغذية البيبى.

مش هننكر أن الرضاعة بتجوّع بس نأكل ايه لما نجوع هيه دى المشكلة!

و لازم لازم نعرف أن الوزن اللى زدناه فى 9 شهور حمل مش هينزل فى أقل من 9 شهور زيهم يعنى نصبر و نخلى الجسم يأخد وقته كامل.

الجملة المشهورة عندنا بتقول الرضاعة بتخسس! هييييييييههه آكل براحتى بقى! لأ طبعاً! كل جسم مختلف عن التانى، فيه اللى بيخزن دهون و فيه اللى بيحرق أسرع المهم أن كله معتمد فى الأخر على نوعية الأكل و نشاط كل واحد خلال اليوم.

تغيير الثقافة و المفهوم الخاطئ – عن الرضاعة – هيساعدك تفهمى أن البيبى محتاج الأكل الصحى من خضار و فاكهة اللى هيساعدوه على تقليل الأنتفاخات و عياط طول الليل.

حقيقة علمية أن الجسم بيحرق لحد 500 سعر حرارى فى اليوم أثناء الرضاعة. اللى هما ممكن يكونوا واحدة سنيكرز مع حبة سناكس لزوم السهر، يبقى مستفدناش حاجة!

طيب ايه الحل؟!
– أولا هتجيبى ازازة مياه ماتسيبيهاش من ايدك طول اليوم دى الببرونة بتاعتك و قبل كل رضعة تشربى كوبايتين مياه كبار.
-دايما تعملى عصائر طبيعية فى البيت أو تشتريها من السوبر ماركت فريش و أهمها عصير البرتقال لأنه غنى بفيتامن سى اللى ابنك محتاجه.
– لو احنا فى الشتا، المشروبات الدافيه هايلة، ممكن كاكاو بلبن خالى الدسم و محلى بالعسل الأبيض و طبعاً الينسون و النعناع.
– حاولى تعملى أكلك كله بطريقة صحية و تبعدى شوية عن المقليات و الحلويات الدسمة. خلاص فترة الحمل و دلع الوحم خلصت.
منتجات الألبان أساسية فى يومك أهمها الزبادى بالليل و كوب لبن خالى الدسم بين الوجبات.
– للسيطرة على الجوع هتقسمى أكلك لوجبات صغيرة على مدار اليوم عشان متحسيش بدوخة أو هبوط نتيجة الجوع.
– خلى ثلاجتك مليانة أكل صحى. امليها فاكهة و خضار على قد ماتقدرى و نوّعى مش كل يوم تفاح و خيار، و ممكن يوم مانجاية كده من نفسك تكون صغنونة أو عنقود عنب.
الحلويات مش ممنوعة و جسمك محتاج سكر بس حاولى تعمليها فى البيت عشان تتحكمى فى كمية الدهون اللى فيها و تاكلى حتة صغيرة الصبح مرتين فى الأسبوع و ممكن البسكوت يبقى اللايت و الشوكولاتة تبقى دارك كمان.

Leave a Reply

Your email address will not be published. Required fields are marked *