Categories
رمضانيات

ورقة لحم الغنم

ورقة اللحمة بتاعتنا مش علي الطريقة التقليدية. بالعكس احنا بنشوف انها فرصة اننا ندمج الخضار في الوجبة من غير ما ناخد بالنا. و بنحب ندخل فيها كل خضار الموسم مش البطاطس و البصل بس. عشان تبقي مغذية اكتر و غنية في الطعم اكتر بكتير.

٥٠٠ جرام لحم غنم مقطع مكعبات
٢ بطاطس متوسطة
١ جزرة كبيرة
٢ بصلة متوسطة
٢ طماطم متوسطة
٤ كوسة صغيرة
٢ طماطم متوسطة
٤ فصوص توم مشقوقة مش مقطعة
ممكن تضيفي خضار تاني علي مزاجك زي الذرة، الفلفل او الباذنجان.
١ معلقة صغيرة بهارات
١ معلقة صغيرة ممسوحة بهارات الكبسة
ملح و فلفل زي ما تحبي
٣ فصوص حبهان
١ ورق لاورو كبير
١/٤ معلقة صغيرة جوزة الطيب

١/٢ معلقة صغيرة مستردة
١ معلقة كبيرة زيت زيتون او زيت نباتي
١ معلقة صغيرة بيري بيري صوص متوسط الحرارة و ممكن تستبدليه برشة شطة حسب ما تحبي.

هنبدأ بتتبيل اللحمة. قلبي اللحم في طبق غويط مع كل البهارات و زيت الزيتون. و سيبيه في التلاجة لحد ما نحضر الخضار.
كل الخضار هنقطعه قطع كبيرة. حلقات او مكعبات، اللي تحبيه.
دلوقتي هنبطن الصينية اللي هتدخل الفرن بفويل.
خرجي اللحم من التلاجة و قلبيه مع التوم و الخضار كويس اوي عشان الخضار ياخد من تتبيلة اللحم.
حطي الخضار و اللحم علي الفويل و غطيه بطبقة فويل تانية.
دلوقتي اربطي ورقتين الفويل ببعض كويس و اتأكدي ان مفيش اي فراغات. عايزين نكتمها كويس اوي.
مش محتاجة مياه لان كل الخضار ده هينزل مياه و مع التتبيلة هتعمل صوص مثالي.
اتأكدي تاني انها مربوطة كويس و ارفعي اطرافها عشان متخسريش السوائل اللي هتنزل.
دخليها علي فرن سخن حرارة ٢٠٠ لمدة ساعة و نص.
طلعيها من الفرن و سيبيها تهدي ١٠ دقايق قيل ما تفتحي عليها.
قدميها مع ارز معمر او رز بالشعرية.