Categories
في المطبخ

هوت تشوكليت

احلى حاجة فى الوصفة دى انك ممكن تحضرى كمية مرة واحدة، يعنى تعملي ليكي و لولادك من غير ما تحتاجى تحضرى كل مج لوحده، أنا بعملها لاصحابى لما بيزورونى فى الشتا، احلى و اسهل من الشاى.

 

لكل كوباية هتحتاجى

كوب لبن

٢ معلقة سكر (اكتر لو بتحبيه مسكر اوى)

معلقة كبيرة مليانة كاكاو خام غير محلى

رشة قرفة (حسب الرغبة)

رشة فلفل اسود مطحون

رشة قهوة سريعة التحضير (للكبار بس، حسب الرغبة)

 

فى كسرولة حطى الكاكاو و السكر و معلقة صغيرة لبن و قلبى لحد ما كل يكوَن عجينة.

ضيفي القرفة و الفلفل الأسود و القهوة، لو تحبى، و قلبيهم تانى كويس لحد ما تتأكدي ان السكر داب تماماً.
زودى نص كمية اللبن و قلبى تانى و اتأكدى ان مفيش كلاكيع قبل ما تضيفي باقى اللبن.
حطى الخليط على نار هادية.
بمجرد ما يبتدى يغلى اطفى عليه.
ممكن تحطى قطع مارشملو للأطفال او رشة كاكاو فوق الوش عند التقديم.