Categories
في المراية

نظام العناية بالوجه

النظام ده انا بطبقه بقالى سنين. بغيّر فيه شوية مع الفصول و بدخل و بشيل منه خطوات حسب احتياج بشرتى. انا بحب الميك أب بس برضه عارفة ان البشرة الحلوة هى الأساس و هتسهل عليا كتير.

اول حاجة تبتدى بيها هى التنضيف: لازم تتأكدى انك شيلتى كل الميكاب و اى آثار ليه انتى ممكن تكونى مش شايفاها. هنا هتستعملى حاجتين. مستحضر لأزالة الميكاب و بعده مستحضر تنضيف الوجه. لو حاسة ان جلدك مرهق ممكن تستخدمى حاجات طبيعية زى نقطة زيت زيتون على قطنة و هتشيل اى حاجة ووتربرف.

الخطوة التانية بعملها مرتين فى الأسبوع: exfoliation او فرك البشرة. الخطوة دى مهمة جدا لأنها بتشيل كل الجلد الميت و بتنضف الخلايا من اى اثار ميكاب او زيوت زيادة فى البشرة. كمان حركة الفرك الخفيفة بتساعد الدورة الدموية و بتشجع البشرة على التعافى.

بعد كده التونر: انا بستعمله بس لما ببقى حاطة ميك اب طول اليوم او حاسة ان بشرتى محتاجة شوية تشجيع انها تمتص الترطيب. ممكن تستبدلى التونر زيى بمياه الورد او الخيار، طبيعية و خفيفة جداً.

بعد كده طبعا الترطيب: و هو ده اللى بيعمل الفرق بجد. احرصى على تغيير المرطب مع الفصول. تركيبة سهل الأمتصاص فى الصيف و تركيبة اقوى فى الشتا.

متنسيش الشفايف و العينين: لازم مرطب مخصوص للأتنين لأن المناطق دى تركيبة الجلد فيها مختلفة و بتحتاج عناية خاصة.

آخر حاجة هى معالجة المشاكل: لو عندك كريم خاص لأى مشكلة بتحطيه آخر حاجة. زى كريمات الحبوب.

كل ما تستخدمى مستحضرات اقرب للطبيعة هتريح بشرتك اكتر. الماسكات الأسبوعية او حتى كل شهر بتنعش البشرة جداً و هتفرق معاكى نفسياً فى جميع الأحوال.

لو عندك مشكلة محتاجة متابعة طبية متتردديش فى انك تزورى دكتور جلدية.

للحاجات البسيطة زى الرؤوس السودا حاولى تعملى حمام بخار قبل ما تستعملى اى مستحضر لأنه هيفتح المسام و يساعد بشرتك تتجاوب مع المستحضر.

مش لازم تحطى مكياج كامل كل يوم. ركزى على العيون و الشفايف هم دايماً احلى حاجة و بيشدوا تركيز العينين ليهم. خلى المكياج الكامل للخروجات الكبيرة و المناسبات و ريحي بشرتك ايام اكتر من الأسبوع.

Leave a Reply