Categories
Featured في البيت

نصايح لغسيل مواعين اسهل

عندى مواعين! الكلمة اللى كرهت الستات فى المطبخ و الطبيخ عموماً لمجرد إنهم بيحملوا هم غسيل المواعين.
مبدئياً كده خلينا نبص للجانب الأيجابى فى الموضوع اللى بيقول إن حوض المطبخ المليان أطباق و كوبيات ده معناه ان البيت ده فيه خير كتير و دى حاجة فى حد ذاتها تريحك و ترفع معنوياتك.
اما بالنسبة للجزء العملى سيبيه علينا، هنديكى شوية نصايح و حلول لغسيل مواعين أسهل بكتير.

 

١. المياه السخنة بتسهل غسيل المواعين بس لو خايفة على ايدك هاتى جوانتى. ممكن جوانتى طبى و يترمى و ممكن جوانتى المطبخ بس لو لاقيتيه بيدخل مياه لأيدك و تتحبس جوه كده يبقى معملناش حاجة و ضرره أكبر من فايدته.

٢. لو ايدك ملتهبة خلاص، البسى جوانتى قطن الأول و عليه الجوانتى الطبى و ده بيتباع فى محلات الأيشاربات.

٣. مريلة المطبخ مش عيب و لا حرام. بس هاتى ٢-٣ كده يبقى شكلهم حلو و كل فترة جددى و هاتى واحدة جديدة بدل ما لبسك يبوظ و تكرهى المطبخ.

٤. ابدائى بالأطباق و الكوبايات. السهل يعنى فى الأول و خلى التقيل فى الآخر

٥. دايماً زودى خل عشان بيقتل البكتريا و الجراثيم و فى نفس الوقت معقم آمن استخدامه مع أى نوع صابون سائل انتى بتستعمليه.

٦. طول ما انتى بتطبخى حاولى تغسلى أى حاجة بتستعمليها فى ساعتها. معلقة قلبتى بيها أو مصفاه عالسريع كده عشان بعد الغداء مثلاً يبقى عندك الاطباق اللى اكلتوا فيها بس.

٧. تنقعى الحلل اللى فيها دهون أو أى حاجة لازقة فى مياه مغلية و صابون.

٨. سخنى البراد جنبك دايماً عشان لو أى حاجة عندت معاكى المياه المغلية تحلها.

٩. هاتى فرشاه مخصصة لغسيل المواعين تبقى ليها ايد طويلة عشان تستخدميها فى تنضيف الحلل و الأزايز و العلب.

١٠. اعملى علبة فيها مياه و صابون و أرمى فيها المعالق و الشوك و كل الحاجات الصغيرة تتنقع قبل الغسل. هتتغسل أسرع و تضمنى انها نضفت من جوة.

١١. غيرى الليفة اللى بتغسلى بيها كل ٢-٤ أسابيع عشان متكونش بكتريا و تقضل تنضف بكفاءة.

١٢. و من الأساس حاولى تقللى من الأدوات اللى بتستخدميها فى الطبخ، متقلبيش بالمعلقة مرة و ترميها يعنى. طبق نضيف جنب البوتاجاز تحطى فيه معالق الطبخ لحد ما تخلصى.

١٣. شغلى الراديو جنبك أو أغانى على الموبايل و انتى بتشتغلى أو نادى جوزك يقف معاكى ولا اتكلمى فى التليفون عشان متحسيش بالملل. جدتى كانت حاطه تلفزيون فوق الديب فريزر، عادى جداً.

١٤. حطى صابونة لأيدك فى المطبخ عشان متستسهليش و تغسلى ايدك بالصابون السايل بتاع المواعين هتلاقى ايدك اتهرت

١٥. حطى فوطة نضيفة و كريم مرطب جمبك على الرخامة عشان بعد كل مرة تغسلى حاجة متنسيش تنشفى ايدك و تحطى كريم

Leave a Reply