Categories
في المراية

نصائح للمحجبات الجدد الشيك

مشكلة ممكن تواجه البنات الجداد فى الحجاب و هى انهم مش عارفين يلبسوا الحجاب ازاى! الموضوع مش صعب ابداً.

أنا مش بعتبر نفسى مختلفة أو بأعمل حاجة إكسترا عن غيري من البنات بالعكس بعتبره حاجة طبيعية جداً و ستايلى الخاص فى اللبس. أنا اختارت الحجاب من أكتر من 8 سنين عمري ماحسيت بأى مشكلة.
و دى شوية من الحلول و الأفكار اللى أنا ماشية عليهم طول فترة حجابى.

 

١. مش لازم ابدا تشترى من محلات المحجبات بس لانها غالبا بتبقى نفس الستايل و ممكن بعد شوية تزهقى منها.

٢. اعملى لنفسك بدجيت (ميزانية) انك تجيبى على الأقل حاجة واحدة جديدة ايشارب مثلًا.

٣. مفيش محل براند أو محل عادى مفيهوش جيبات و جواكت و بلوزات و بنطلونات واسعة أو حاجات طويلة.

٤. هو فى الأخر مبدأ و قرار! لفى و دورى و اتعبى شوية بس هتلاقى.

٥. هاتى ليجنجز قطن البسيهم من تحت الجيبات دايماً، فى الشتاء هيدفوكى و فى الصيف يمنعوا العرق و الأحتكاك.

٦. البلوزات المفتوحة من فوق ليها كذا حل، فيه بديهات قطن صغيرة كده بتتلبس تغطى الرقبة و الكتاف و بأستك من تحت الصدر هتلاقيها فى محلات الأيشاربات، و ممكن .تجيبى عليها طرحة عريضة شوية أو تلبسى سكارف و ممكن كل مرة تلبسيها بشكل من دول

٧. الصيف مليان فساتين، عيشى حياتك وهاتى أشكال و الوان و عليهم بوليرو اللى هو جاكت قصير عشان طويل مع قصير أحلى.

٨. ابعدى كل البعد عن البديهات اللى بتبقى لازقة على الجسم دى و بدليها بأقطان أو قمصان اشيك بكتير.

٩. الأكسسوار بينطق أى لبس و يغير فى شكله يعنى مرة ساعة مع سلسة طويلة و خاتم أو مرة حزام و سكارف أو شال شيك كده على كتفك فى الشتاء.

١٠. جربى لفات طرح جديدة بس أهم حاجة تبقى لايقة على رسمة وشك و تبقى مرتاحة فيها نفسياً قبل ماتنزلى بيها الشارع.

١١. لو لبسك منقوش حاولى تكسريه بلون ايشارب سادة و هادى و العكس لو لابسه طقم بسيط جدا نطقيه بايشارب ملون و منقوش.

١٢. تعاملى مع الحجاب على انه قطعة مكملة للبس مش دخيلة عليه. بمعنى انك تختارى لون ايشارب من نفس درجات اللبس لأن اختيار درجة بعيدة عن اللبس بيحسسك ان الأيشارب دخيل على اللبس مش مكمل ليه.

١٣. ياريت بكل الطرق تبعدى عن الطرح المنفوشة اللى خامتها بتكون ناشفة و أكبر من حجم الوش بكتير، اختارى الخامات الطرية زى القطن و الكريب و الشيفون أو أى خامة طرية تريحك و البسى تحتها بندانة قطن خفيفة عشان متتزحلقش و فى نفس الوقت مش هتحسى بحرارة و لا أى حاجة.

١٤. تناسق الخامات كمان مهم جدا. بمعنى لو لابسه بلوزه فيها ستان أو شيفون و عليها ايشارب قطن حتى لو نفس الألوان هتحسى انك ضيعتى شياكة البلوزة و العكس صحيح لو لابسه تى شيرت قطن و عليها ايشارب فيه لامعة هتحسى انها مش مناسبة.

Leave a Reply