Categories
9 شهور

١٠ نصائح لحمل مريح

اكيد الحمل فى حد ذاته تجربة، و احسن حاجة تساعدك على ان حملك يبقى سهل هو انك تحاولى تستمتعى بالتجربة دى. بالحلو و الوحش فيها. انا لسه حامل و بحاول ابص لحملى طول الوقت بطريقة ايجابية، حتى فى الايام المتعبة اللى ببقى مش عايزة اقوم فيها من السرير. الـ10 حاجات دول هما اللى بركز معاهم كل يوم و الحمد لله لحد دلوقتى اقدر اقول ان الحمل ده حاجة جميلة.

 

1. شاركى حملك مع اللى حواليكى:

مش لازم تقولى لكل الناس اللى تعرفيهم انك حامل، ممكن تستنى زى ما انتى عايزة. بس انا و جوزى قولنا لصحابنا القريبين و استمتعنا فعلا بكل الفرحة اللى صحابنا حسوها. سيبك من صحابك، ركزى مع مامتك و حماتك و شوفى الفرحة فعلاً فى عينيهم.

 

2. ساعدى جوزك يستمتع بحملك:

مش لازم اول ما تشوفيه تحكي له بالتفصيل كل انقباضة جتلك او غثيان. لازم تعرفى انه على اد ما هو مبسوط انه هيبقى اب، هو كمان مرعوب من المسئولية و خايف عليكي و بيفكر طول الوقت فى البيبى. ابتدى بالحاجات الحلوة، البيبي خبط كام مرة، ابعتي له فيديو بيبى بيضحك و بعدين ممكن تحكي افلام الرعب اللى بتحصلنا.

 

3. اسمعى جسمك:

ركزى مع كل حاجة جسمك بيقولهالك. لو حسيتى بوجع، ريحي. لو نفسك تاكلى حاجة، اطبخيها. جسمك هيتغير تماماً و عشان يساعدك هيبعتلك اشاراتك صغيرة لازم تسمعيها و تسئلى دكتورك عنها.

 

4. استمتعى بالفترة دى للماكس:

كل اللى حواليكي هيدلعوكى، و انتى لازم تستغلى الدلع ده. لما تبقى ماما لبيبي معتمد عليكى كلياً هتتمنى لو فضلتى حامل شهر كمان. صورى بطنك و هى بتكبر، ممكن كل اسبوع او كل شهر. اعملى لنفسك مساچ او اطلبى من حد يدلك لك الحتة اللى بتوجعك فى ضهرك. و متنسيش تستمتعى بالبيبي كمان: حاولى تاخدى بريك فى نص اليوم تنامى فيها على جنبك و تستنى البيبي يخبط. اقرى كتير عن نمو الطفل فى الرحم، فى الـ 3 شهور الاولانية بالاخص عشان بيبقى النمو سريع و بتكونى لسه محستيش بالحركة. اعرفى البيبى بقى حجمه اد ايه و اتعلم يحرك صوابعه ولا لسه!

 

5. متفكريش فى نوع البيبي:

حتى لو ده مش اول حمل ليكي. التوتر ده مش هيفيدك، بالعكس ممكن يضرك و يبوظ فرحتك بالحمل. خليكى مستعدة للاحتمالين. هتقعى فى حب البيبي ده فى جميع الأحوال.

 

6. معادلة الدكتور و جوزك:

لو جوزك مستريح مع الدكتور بتاعك هتفرق معاكى كتير، متنسيش ان هو كمان هيكون عنده اسئلة. انا مثلاً وصلت لمرحلة ان الدكتور بيخلى جوزى يفتن عليا لو مكلتش كويس او نسيت الفيتامينات، بيسأله هو الاول قبل ما يسألنى. ده كمان هيخلى جوزك ميحسش ان معاد الدكتور ده روتين و ممل، لما يكون ليه دور فى الزيارة و بيشارك فيها، مش هايحس انها حاجة تقيلة على قلبه.

 

7. دكتورك هو احسن حد يعرفك:

هو احسن صحابك طول فترة الحمل و هو اكتر حد يعرف البيبي بعدك. فى الفترة الأولى من الحمل خاصة كل اللى حواليكي هيدوكى مليون نصيحة، اسمعيهم و اكتبيهم و راجعى كل واحدة مع الدكتور، حتى الحاجات اللى ممكن تشوفى انها بديهية الدكتور ممكن يبقى ليه رأى مختلف. عشان هو عارف كل تاريخك ممكن يسمح بحاجات اللى حواليكى ممكن يجمعوا انها ممنوعة. انا مثلاً مسموح لى بكوباية كافيين فى اليوم؛ قهوة او شاى، واحدة بس و مش دايماً بأشربها بصراحة، بس مريح انك تبقى عارفة كل حاجة من الدكتور و مش من الأنترنت او صحابك. و متنسيش اهم حاجة هنا؛ مفيش اسئلة تافهة او ملهاش لازمة. كل معلومة هتفرق فى نظام حياتك.

 

8. بلاش المقارنة:

كل واحدة حملها مختلف و كمان كل حمل لنفس الأم بيبقى مختلف. حملك ده تجربتك الشخصية و هتبقى مختلفة تماماً عن كل صاحباتك و اخواتك و حتى مامتك. متسمحيش لحد انه يخوفك من حملك، فيه احتمال ان حملك يبقى اسهل. فى اول حملى كل صحباتى خوفونى من الغثيان، الحمد لله جالى قليل جداً و على الاسبوع الـ10 كان اختفى. ممكن عشان التفكير الايجابى بيبعد الاعراض الوحشة؟!

 

9. انتى لسه نفس الشخص:

بس حامل يعنى عيشى حياتك عادى بس متعمليش اى حاجة من الممنوعات. لو بتحبى تخرجى متحرميش نفسك عشان انتى حامل، بس حاولى تبعدى عن الأماكن اللى فيها مدخنين. لو انتى متعودة تمشى، اتأكدى من الدكتور بتاعك انك ممكن تمارسى رياضتك المفضلة. خليكى فاكرة انه مش معنى انك حامل انك تقضى اليوم فى السرير و خايفة تخرجى من البيت. بالعكس كل الناس هتبقى لطيفة معاكى و هيبتسموا و هايحاولوا يساعدوكى بأى طريقة.

 

10. اشغلى وقتك:

متديش فرصة للأفكار المرعبة و ابعدى تماماً عن قصص الولادة اللى كل واحدة هاتحاول تحكيهالك، فاكرة رقم 8؟ فى آخر شهرين وضبى شنطتك و اغسلى هدوم البيبي. فى الشهور الأولى اتفرجى على ديكور اوض الأطفال و اللبس اللى يتاكل من حلاوته! و متنسيش تذاكرى الرضاعة، تغيير الحفاض و كل الحاجات الجديدة عليكي. حاولى تصنعى حاجات للبيبى او لديكور الأوضة.

Leave a Reply

Your email address will not be published. Required fields are marked *