Categories
في المراية

مياه الخيار: تونر لطيف و مرطب طبيعي

التونر اساسى فى روتين العناية اليومى بالبشرة. فى الصيف بالأخص بنبقى محتاجين تونر قوى ينعش البشرة و يرطبها بعد حر اليوم الطويل. يا سلام بقى لو التونر ساقع كمان! عشان انا بحب البدائل الطبيعية و زهقت من استخدام مياه الورد، عملت تونر من اكتر حاجة بحس انها بترطب بشرتى لما بدخلها فى ماسك؛ الخيار.

الخيار اساسا ًمياه و مرطب جداً للبشرة و بيشد الجلد كمان. و بعيدا عن كل المواد الكيميائية اللى موجودة فى التونر اللى بنشتريه. لما تعمليه حطيه فى بخاخة و حطيه فى التلاجة و استخدميه ساقع.

هتحتاجى حاجة واحدة بس. خيارة.

 

• قشرى الخيارة 

• قسمى الخيارة لـ3 اجزاء. هتستخدمى 2/3 بس

تونر الخيار

• قطعى الخيارة مكعبات صغيرة جداً

• انقليهم فى حلة صغيرة و حطى معاهم مياه تغطى الخيار

• سيبيه على نار هادية 5 – 7 دقايق بدون غليان عايزين ندى فرصة للخيار انه يطلع المواد المغذية بس بدون غليان عشان منقتلش المواد دى.

• سيبيه يبرد 10 دقايق

تونر الخيار

• انقليه للخلاط و اضربيه لمدة 20 ثانية متواصل

تونر الخيار

• صفيه من اى قطع كبيرة متبقة فيه عشان يبقى سهل انك ترشيه

• صبيه فى بخاخة و احفظيه فى التلاجة. هيقعد فى التلاجة ما بين 4-7 ايام.

 

ممكن تستخدميه كـ:

• تونر طبيعي للبشرة: ممكن تستخدميه بعد غسول الوجه قبل ما تحطى المرطب.

 • مرطب للبشرة: رشى منه مباشرة على بشرتك عشان يرطب و ينعش.

• عشان يقلل من انتفاج العينين و الهالات السوداء: ممكن تبللى بيه قطنة و تحطيها على عينيكى

• ممكن تخلطيه مع الزيوت اللى تحبيها و تعملى بيه ماسك خفيف لمدة 10 دقايق.

1 reply on “مياه الخيار: تونر لطيف و مرطب طبيعي”

Leave a Reply