Categories
9 شهور

مش لازم تلبسى لبس حوامل

كل واحدة جسمها مختلف و مع الحمل هيتغير و هيفاجئك كل يوم. عن نفسى، بطنى كانت بتكبر بسرعة اوى و على الخامس احتجت لبس حمل. ممكن غيري تفضل للشهر السادس او بعده و بطنها صغيرة. بس هتحتاجى لبس حمل يعنى هتحتاجيه. المشكلة ان المحلات المتخصصة فى لبس الحوامل فى مصر قليلة و اللى موجود مش احسن حاجة فى الدنيا و بأشكال و مقاسات قليلة.

اتعلمت كام خدعة فضلت البس بيهم لبس قبل الحمل و اشترى لبس عادى مش لبس حوامل.

١. الفستان + الحزام: الفساتين القصيرة الجميلة اللى موجودة فى معظم المحلات طول السنة زى H&M. تجيبيه واسع شوية عشان لسه بطنك هتكبر و تبقى مستريحة و انتى قاعدة. الحزام هتربطيه عند المنطقة اللى تحت الصدر. هيبين البطن و هيبقى شكلك حلو لأنه هيقسم المنطقة اللى كانت منفوخة و نازلة حتة واحدة بدل ما تبقى عاملة زى الخيمة. البسى معاه ليجنجز مريحة مع بوط فى الشتا. او مع كونفرس بسيط فى الصيف.

٢. الماكسى: سواء فساتين او سكيرتس. مريحة جداً و موجودة فى اماكن كتير. ركزى مع طولها لأنك هتحتاجى كام سنتيمتر زيادة مع كبر البطن عشان ميبقاش قصير من قدام.

٣. البلوزات: دورى على اللى بيكونوا واسعين من عند البطن. فيه كمان موديل بيبقى مقسوم من عند الصدر، ده بيبقى احلى فى اللبس. المهم ان البلوزة تبقى flowy، عشان تدى مساحة لبطنك.

٤. ده dress ولا tunic؟: استفيدى من الفساتين الكاجوال القصيرة و البسيها على انها تونيك. على اى جينز من عندك و متنسيش الحزام معاها.

٥. خدعة التوكة: ممكن تشترى belly band بس على ما تلاقيه هنا او تجيبيه من بره هتكونى ولدتى. لفى استك شعر فى عروة البنطلون من ناحية و اربطيه فى الزرار من الناحية التانية و متقفليش السوستة يا ستى. و البسى بنطلوناتك اللى بتحبيها لشهر او اتنين تانى.

٦. اختارى القماشات: دورى على القماشات اللى فيها نسبة elasticity او سترتش شوية. هتلبسيها التسع شهور و بعد الحمل كمان.

٧. بنطلون الحمل: ده لابد منه. انصحك تبعدى عن اللى بأزرار. دورى على اللى مضاف ليه جزء قماش من فوق. ده اريح لأن الزراير هتخش تحت بطنك و تقرفك و هتيجى فى الآخر و هتبقى مش طايقاها.

٨. السويت بانتس: مش عيب على فكرة فى المشاوير البسيطة زى السوبرماركت او لو رايحة لمامتك. هاتى حاجة قطن عشان تبقى مريحة اكتر.

Leave a Reply