Categories
في المطبخ

مربى الفراولة

بحب الفراولة جداً و مربى الفراولة البيتي من أسهل و أسرع أنواع المربى هى بس مشكلتها لما هتجربوا تعملوها فى البيت صعب ترجعوا تشتروها من السوبرماركت تاني لأن طعمها و قوامها أحلى و أغنى بكتير خصوصاً بالطريقة دي.

٣ كيلو فراولة

٢ كيلو سكر

عصير ليمونة

هنجيب 3 كيلو فراولة مغسولة كويس جداً و متنضفة.

التقطيع حسب مزاجك ممكن تقطعيها أربعة أو نصين أو حتى تسيبيها زى ماهي.

هنستخدم حلة كبيرة و واسعة شوية عشان الفراولة تستوي أحسن.

 السكر: أنا بحط للتلاتة كيلو فراولة ٢ كيلو سكر و دي ادتنى نتيجة هايلة و طعم و قوام مظبوط بعد تجارب كتير. تقدرى طبعا تزودي السكر بحد أقصى كيلو سكر لكل كيلو فراولة و تقدري تقللي لنصف كيلو سكر لكل كيلو، لكن نصيحتي تجربيها بالمقادير دي هتطلع مظبوطة أكتر.

بعد ماحطينا الفراولة فى الحلة و عليها السكر يفضل نسيبها ساعة تنزل مايتها و ممكن تعملي الخطوة دى من بالليل.

هنولع عليها نار متوسطة و نسيبها تغلي و كل شوية نشيل الريم الأبيض اللى بيطلع من فوق بالمعلقة.

بعد ماتبتدي تتقل و تتماسك شوية هنعصر عليها الليمونة و نسبها تغلي من 10 ل 15 دقيقة تاني لحد ماتعقُد حلو و تدينا قوام مظبوط.

هنسيبها تهدى خالص و بعدين نفضيها فى برطمانات مغسولة و معقمة و لو عايزة تعرفي ازاى تجهزي البرطمانات للتخزين دوسي هنا.

و ناخد بالنا لو حسيناها خفيفة شوية عادي جدًا هى هتتقل لما تبرد و تدخل التلاجة بلاش نطول عليها أوى على النار عشان متتلسعش أو تلزق.

تقدري تخزنيها فى التلاجة لشهر كامل.

مربي فراولة بيتي

Leave a Reply