Categories
في المطبخ

مترميش اكل تانى

معظمنا عنده عادة ظريفة جداً. نطبخ و نشتري اكل اكتر من حاجتنا بدل ما الاكل يخلص و احنا بنتغدى. انا شخصياً بأعمل كده. إللى بيحصل بقى حاجة من اتنين، بناكل بعد ما بنشبع او نفضل نفتح التلاجة نلقّط اكل و نتخن. او الاكل بيفيض و يعيش فى التلاجة. و هو و ظروفه بقى. بدل ما ترمى:

 

١. اشترى على قد ما هتستخدمى: يعنى بدل ما تجيبي كيلو خيار و خلاص هاتى على قد ما هتستخدمى لحد ما تشترى تانى. لو بتستهلكى 5 خيارات فى الاسبوع يبقى اشترى 10 لو هتشترى تانى كمان اسبوعين.

٢. اعملى List: اعرفى ايه الحاجات اللى انتى هتحتاجيها. متلميش شوية حاجات تتركن فى التلاجة لحد ما تبوظ.

٣. اشترى احجام اصغر: المشكلة دى كانت بتواجهنى بالأخص مع علب كريمة الطهى، كانت دايما بتبوظ قبل ما اخلصها و يترمى قرب نصها. قررت اشترى حجم اصغر. لما خلصت اشتريت تانى او كملت الشهر من غيرها عادى.

٤. استثمرى فى علب محكمة الغلق: من الانواع اللى بتمنع دخول الهوا. دى احسن حاجة تحفظى فيها الاجبان و بواقى الاكل فى التلاجة.

٥. الفريزر: مش للمجمدات بس، لبواقى الاكل اللى انتى عارفة انها مش هتخلص اليومين اللى جايين. و للعيش و الخضار.  اعرفى اكتر عن تخزين الخضار من هنا .

٦. بتجربى انواع جديدة؟ متشتريش كمية كبيرة. ممكن متعجبكيش و يبقى مصيرها الزبالة.

٧. روحى السوبرماركت بأنتظام: كل اسبوعين هو احسن حاجة، مش هتحتاجى تخزنى الحاجات الى بتبوظ بسرعة و تشترى الخضار و الفاكهة فريش.

٨. قسمى على قد ما هتستعملى: مثلاً الجبنة اساسية فى البيت، لو هأشترى نص كيلو عشان يكفى اسبوعين بأطلب من السوبرماركت انه يتقسم على طبقين ¼ كيلو، بأفتح واحد للأستخدام و اخزن التانى فى الفريزر لوقت ما هأحتاجه.

٩. استعملى بواقى اكل امبارح فى اكلة النهارده متسيبيهمش يتركنوا لحد ما يبوظوا. ممكن كمان تعملى يوم اسبوعى لبواقى الأكل على الغدا و اهو تستريحى من الطبخ يوم.

١٠. الخضار اللى بدأ يطرى او خلاص قرب يبوظ دخليه فى صوص المكرونة او اعمليه سلطة.

١١. الفاكهة اللى خلاص بتودّع اعمليها عصير او آيس كريم.

١٢. اللبن اللى بقاله كتير فى التلاجة اعملى بيه كريم كراميل او رز باللبن.

١٣. العيش اللى بدأ ينشف حمصيه و حطيه على السلطة . ممكن تدهنيه زيت زيتون و توم قبل التحميص و تقدميه جنب الأكل.

١٤. جمدى الشوربة اللى فاضلة و استخدميها فى الطبخ بقية الأسبوع. ممكن تتخزن فى الفريزر لأكتر من شهر.

١٥. عندك جبنة مش عاجبة حد، خبيها فى صوص الألفريدو او على وش البيتزا.

١٦. تاريخ الصلاحية اكيد مهم جداً. و انتى بتشترى ركزى متجيبيش فوق احتياجك من السلع اللى تاريخ صلاحيتها قرب ينتهى. و انتى فى المطبخ كمان تستخدمى الحاجة حسب تاريخ الصلاحية زي برطمانات الصلصة او علب الكيك الجاهز. رتبى دولاب التخزين حسب ما هتستخدمى عشان يسهل عليكي المهمة.

١٧. طريقة الحفظ بتطول من عمر الحاجة. اعرفى ايه لازم يدخل التلاجة و ايه ممكن يستنى بره و يعيش قد ايه.

5 replies on “مترميش اكل تانى”

Leave a Reply

Your email address will not be published. Required fields are marked *