Categories
Featured في المطبخ

مبعرفش اطبخ. ابتدى منين؟

بأشوف ان معرفة اساسيات المطبخ من اساسيات الحياة او life skill. آه ممكن نطلب اكل كل يوم. بس الوقفة فى المطبخ ليها طعم تانى. تجربة وصفة جديدة و الشوق انك تدوقى العك ده هيطلع حلو ولا لأ تجربة فى حد ذاته. اتشجعتى؟

 

تبدأى منين؟ هاتى وصفة حلوة. الوصفات على الانترنت مفيش اكتر منها و ممكن كمان تجيبي كتاب طبخ.

• اختارى وصفة تكون مكوناتها قليلة عشان تبقى سهلة فى التحضير. و أبعدى عن اى حاجة هتحتاج تكنيك معين فى الطبخ.

• يا سلام لو تدورى على حاجة انتى بتحبيها. هتستمتعي أكتر و هتلاحظى نتايج أحسن.

• اقرى الوصفة لآخرها الاول. عشان متلاقيش اى مفاجأت. اقرى كل خطوة و تخيلي نفسك بتحضريها.

• جهزى المكونات. زى بتوع برامج التليفزيون كدة. فى أطباق صغيرة وضبى كل حاجة و رصيهم قدامك.

• مش معنى انك عايزة تطبخي انك لازم تحطى الاكل على النار، لو عملتى سلطة حتى هتبقى خطوة. و على فكرة فيه سلطات معقدة جداً، أبعدى عنها فى الاول.

• أسألى خبير. مامتك او صاحبتك إللى شاطرة فى الاكل. هم ممكن يرشحولك وصفات سهلة تبدأى بيها.

• اتفرجى على حد بيطبخ. سواء فى البيت او على الانترنت.

• تقبلى فكرة انك ممكن تحرقى الاكل او يطلع طعمه عجيب. ما انتى لِسَّه بتتعلمى. متقفشيش و كملى بكل ثقة.

• اشترى أدوات جديدة. خاصة لو بتتعلمى فى مطبخ مامتك. هاتى كام حاجة يحسسوكى بالانتماء.

• جربى وصفة جديدة كل اسبوع.

• اتعلمى من الوصفات الفاشلة. دوقيها و اعرفى الغلط فين.

• ثقى فى نفسك. و انتى بتطبخى، لو حسيتي ان اضافة معينة من عندك ممكن تحلّلى الاكلة، جربى و متخافيش.

• اعملى فيها الناقد. و انتى بتاكلى حاولى تتعرفى على البهارات او الطعم المميز فى الطبق و فكرى ايه ممكن يخليه احلى.

• استعملى ايديكى. الفرخة مش بتعض. حسى بالمكونات و اعرفى الـtextures المختلفة اللى بتحطيها فى طبقك.

• دوقى الأكل مليون مرة. مع كل خطوة لو امكن. هتعرفى الطعم بيتغير و يتطور ازاى و اهو برضه تلحقى اى مصايب فى اولها.

• اعملى كتاب الطبخ بتاعك. جمعى الوصفات اللى نجحت معاكى فى نوت بوك. و زودى عليها ملاحظاتك مع كل حاجة جديدة تتعلميها.

متخافيش، المطبخ مش صعب