Categories
في المطبخ

ماك اند تشيز عَ السريع

وصفة هيحبوها الكبار و الصغيرين و ممكن الولاد يعملوها لوحدهم لما يجوعوا، أو تعمليها فى الشغل بدل العك و أكل الشوارع. شوية مكرونة فى كيس و شريحة جبنة و اسرقى شوية لبن من البوفية هتلاقى غداكى جاهز فى 10 دقايق.
و يا سلام على ايام الكسل لو فيه شوية بواقى خضار أو فراخ من امبارح ترميهم على المكرونة و تبقى جاهزة وجبة كاملة.

 

نصف كوب مكرونة
نصف كوب مياه
ربع معلقة صغيرة ملح
ربع كوب لبن
من ربع لنصف كوب جبنة أى نوع شيدر، جودة، فلمنك
إضافات: خضار، قطع فراخ أو لحمة مستوية، سوسيس، سلامى، هوت صوص.

 

هنحط المكرونة و المياه فى بولة شوربة أو مج غويط يكون مخصص لدخول الميكروييف.
ندخلها الميكروييف دقيقتين و نراقبها لو عملت رغاوى و حسينها هتفور نوقف و نطلعا نقلبها و نرجعها تانى.
نكمل بنفس الطريقة تقريباً سبع دقايق أو حسب قوة الميكروييف لحد المكرونة ما تستوى.
لما المكرونة تشرب كل المياه و تستوى نزود معلقتين مياه تانى عليها.
نضيف الجبنة و اللبن و نقلب و أى إضافات تانية عايزنها نضيفها دلوقتى.
ناخد بالنا ان المج ممكن يبقى سخن جامد نمسكه بفوطة أفضل.
ندخلها الميكروييف تانى 30 ثانية فى 30 ثانية كده لحد ما الجبنة تسيح و تكون صوص كريمى، تقريبا هتاخد دقيقة و نص كمان.
لو عايزين صوص كريمى أكتر نزود جبنة و مكعب كيرى.
طعمها بيبقى أحلى لما تتاكل فى ساعتها كده بس لو هنحتاج نسخنها نزود معلقتين لبن عليها و نسخنها عادى.