Categories
في المراية

لتفتيح البشرة: ماسك الكركم و الليمون

الماسك ده ممتاز فى الشتا خصوصاً، لأنه مش بيفتح بمعنى تفتيح درجة لون البشرة. لكن بمعنى صحى، انه بيعالج المشاكل اللى بتطفى لون البشرة و بتخلى لونها باهت.

الماسك فيه كمان عسل، و يخليه ممتاز لكل انواع البشرة و مناسب للبشرة الحساسة او اللى بتعانى من الحبوب.

العسل هنا هيدخل تغذية و ترطيب، و هيحارب البكتريا او الألتهابات، هيتضف المسام و يشتغل على المناطق اللى فيها بقع او جروح من حب الشباب.

الكركم ممتاز لأنه زى العسل بيحارب البكتريا و زيادة عليه بيقلل احمرار البشرة او عدم توازن لونها، بمعنى اصح بيوحد لون البشرة مع الأستخدام. و مع خلطه بالعسل هتشوفى ان اى حبوب فى الوش هتقل و هيعالجوا اى آثار لحبوب قديمة.

الليمون مليان فيتامين سى، و اساسى لتفتيح البشرة، ده طبعا بجانب انه معقم طبيعى. الليمون فى الماسك ده مش هيحرق خالص، لأن معاه عسل. بالعكس هيحسسك بأنتعاش و هيسيب ريحة حلوة.

آخر حاجة هى الشوفان. ده عشان الترطيب و بس. الشوفان كمان هيخلى قوام الماسك اتخن شوية و يعادل بين الليمون و العسل و الكركم. لو جايبة شوفان كامل، اضربيه فى الخلاط او الكبة لحد ما يبقى ناعم زى الدقيق.

الماسك سهل جدا:

3 معالق كبيرة شوفان

1 معلقة كبيرة عسل

½ معلقة صغيرة كركم

½ معلقة صغيرة عصير ليمون

ًقلبى كل المكونات لحد ما تتأكدى انها اتخلطت تماما

حطيه على بشرة نضيفة

و سيبيه 15 دقيقة

و بعدين اشطفيه بمياه دافية

ممكن تحتاجى تشطفى وشك كذا مرة لو حاسة ان الكركم ساب لون اصفر

Leave a Reply