Categories
في البيت

كل حاجة عايزة تعرفيها عن البوتاجاز الزجاج

طول عمري عندي بوتاجاز عادي، بنار عادية و كنت مبسوطة بيه. لحد ما عزلت و شقتي الجديدة فيها بوتاجاز ازاز بعيون كهربا. الموضوع كان غريب شوية في الاول. بس لما تاخدي عليه هتتعودي و تحبيه اكتر.

الموضوع احتاج شوية تعليم في الاول بس بعد كده اخدت علي مميزاته.

١ . سهل جدا في التنضيف. من غير هزار، بيتنضف في ثواني. و هتلاقي تحت كمان طريقة تنضيف مكثفة لو البوتاجاز بقاله فترة مش بيتنضف. مجرد بستناه يبرد و امسحه بفوطة مبلولة خفيف بمياه و خل. بس كده.

٢ . بيحافظ علي الحرارة. عايزة تطبخي علي نار هادية، نار متوسطة، هو بيفصل و يشتغل عشان يفضل محافظ علي درجة الحرارة. معناه ان الأكل مش هيتلسع حتي و انا موطية عليه و أني مش محتاجة شياطة تحت الارز و مش بستني الزيت يسخن في ساعة و انا بقلي الاكل.

٣ . مش هتحتاجي تسخني الاكل. لأن العيون الكهربا بتحتاج وقت عشان تبرد. معناه انها هتحتفظ الاكل سخن كمان لمدة ممكن توصل لساعة.

٤ . التايمر. معظم الأنواع معاها تايمر بيلت ان. اختراع ممتاز بصراحة. ببساطة بتظبطي التايمر مع العين اللي تختاريها و هو لوحده بيطفي البوتاجاز. مش هيطفي كل العيون. في الغالب بيبقي فيه تحكم منفصل لكل عين او تايمر واحد تظبطيه علي اخر عين استخدمتيها. الارز مثلاً بوطي عليه و اظبط التايمر علي ١٦ دقيقة بالظبط، و أنساه و اركز مع باقي الاكل.

٥ . الأمان. عشان هو مسطح تماماً معناه ان مفيش وسيلة الأطفال يوصلوا له بسهولة. و كمان معظم الأنواع بتبقي راكبة علي زرار كهربا يعني ممكن تفصليه بالكامل. ده غير انه عشان مفيش نار، هيمنع اي حوادث في المطبخ، لا قدر الله. زي صاحبتي متخصصة حرق فوط المطبخ. و هو كمان مزوّد بنظام حماية لنفسه، يعني لو اي سوائل اتدلقت عليه و هو سخن، بيفصل لحد ما تنضفيه. بدل ما الحاجة تتحرق و تعمل دخان في البيت.

٦ . مساحة إضافية. عشان هو مسطح، معناها انه و هو مطفي ممكن تستخدميه مع باقي الرخامة عادي. حطي عليه الصينية اللي هتطلعي عليها العصير للضيوف، مش هيعترض. انا مرة فردت عليه عجينة البيتزا. مساحته مش مهدرة.

كلام جميل. امال ايه عيوبه.

الموضوع كان بايخ شوية في النقل الاول من البوتاجاز العادي. ببساطة لان البوتاجاز العادي بيسخن أسرع. تحطي الحلة في ثواني النار سخنتها. علي عكس الكهربا. خصوصا في الموديلات القديمة بيحتاج شوية وقت في الاول.

دي اول نقطة بتتعودي عليها مع الوقت. لازم الحلة تسخن كويس قبل ما تبدأي تطبخي، عشان تفضل الحرارة مظبوطة طول الطبخ.

تاني حاجة نوع الحلل او أدوات الطبخ بتاعتك. مش كل الأنواع مناسبة مع السطح الازاز. احسن انواع اللي ليها قاعدة محددة عشان تسحب الحرارة مظبوط. غير كده هتحسي ان توزيع الحرارة مش مظبوط او ان الحلل مش بتسخن كفاية. بس ده بيبقي في الاساس بسبب نوع الحلل.

غير كده معنديش اي اعتراضات.

زي ما قلت فوق، للتنضيفة اليومية بستخدم بخاخة الخل اللي عندي في المطبخ. فيها كوب خل مع كوب و نص مياه.

لو البوتاجاز متبهدل جامد بعمل الطريقة دي.

-و البوتجاز ناشف، ابدأ الاول ارش المناطق المتوسخة جامد او فيها قطع محروقة او لازقة بالبيكينج صودا.

-تاني خطوة احضر فوط مطبخ نضيفة كفاية انها تغطي كل الاماكن اللي اترشت بالبيكينج صودا.

-في طبق غويط هحط فوط المطبخ و ارشهم بخل لحد ما يتشربوا الخل كويس. مش عايزينهم غرقانين خل، يعني يبقي مبلولين بس.

-دلوقتي براحة بقوم افرد الفوط علي البيكينج صودا. المفروض تعمل رغاوي و تفور وهتسمعي لها صوت.

-سيبي الفوط عشر دقايق بالظبط و بعدين شيليهم.

-آخر خطوة بجيب فرشة سنان نضيفة و ابلها بصابون غسيل الاطباق و ادعك بيها الاماكن المتوسخة كلها.

-مش هتحتاجي مجهود كتير، كله هيستسلم من اول مرة.

-خلاص كده، امسحي البيكينج صودا و الصابون بفوطة ناشفة و بعدين امسحي البوتاجاز بفوطة مبلولة و نشفيه.

فلة!

البوتجاز الازاز الزجاج الكهربا

Leave a Reply