Categories
مع العيال

كل اللى محتاجة تعرفيه عن الحرارة عند الأطفال

الحرارة من اكتر الحاجات اللى بتخوف الأم. بس اللى اكتشفته ان الحرارة مش دايماً حاجة وحشة، بالعكس دى دليل على ان الجسم بيحارب العدوى او المرض. بشرط ان الحرارة تبقى فى حدود معينة.

درجة حرارة الجسم الطبيعية ما بين 36.1 و 37.2. من سن 0-6 شهور الحرارة لو تعدت الـ38 تكلمى الدكتور و تتابعى اى اعراض تانية. و من سن 6 شهور لما فوق تتابعى مع الدكتور لو الحرارة تعدت الـ39.4. مش لازم توصل للأربعين.

 

اتعلمى الأول ازاى تقيسي الحرارة، عن طريق الفم، الاذن، الأبط او الشرج.

• استخدمى ترمومتر ديجيتال و ابعدى تماماً عن الترمومتر الازاز عشان خطر التعرض للزئبق.

• دايماً تقرى التعليمات او النشرة اللى بتبقى مع الترمومتر. انا بحافظ عليها فى نفس العلبة معاه لأن دايما بيبقى فيها معلومات مهمة بحتاجها عن كيفية استخدامه.

• تقريبا كل الأنواع بتصفر لما بتبقى جاهزة انك تستخدميه و بتصفر تانى لما بتخلص.

• اقرى كويس جداً تعليمات القياس عن طريق الشرج. لأن هى دى الطريقة الأدق لقياس الحرارة. يفضل لو الترمومتر عليه علامة للمنطقة المسموح دخولها لجسم الطفل.

• لو هتستخدميه تحت الأبط يبقى تتأكدى انه ملامس للجلد من كل الجهات و مش الهدوم. و تثبتي دراع البيبي عشان الترمومتر ميتحركش.

• لو عن طريق الفم يبقى تتأكدى انه يبقى تحت اللسان. و الطريقة دى افضل مع الأطفال الاكبر، من عمر الـ3 سنوات.

• طبعا لازم تنضفيه بقطنة بكحول قبل و بعد كل استخدام.

• متستعمليش نفس الترمومتر لقياس الشرج و اى منطقة تانية. هاتى ترمومتر تانى لو عايزة تستعملى طريقتين، و اكتبى على الترمومتر الخاص بالشرج عشان متتلخبطيش.

 

على العموم لو الحرارة متوقعة، زى بعد بعض التطعيمات او لو مع اعراض نزلة برد بتسيطرى عليها بأنك:

• تشجعى الطفل بأنه يشرب سوائل كتير. لو بيبي يبقى ترضعيه كل ما امكن. عشان تبعدى عن الجفاف.

• تلبسيه هدوم قطن وزنها خفيف. مش محتاجة تدفيه او تخففى اوى يبرد.

• لو الطفل بردان تغطيه بحاجة خفيفة و متزوديش قطع الملابس.

• تعملى كمادات مياه فاترة. مياه بنفس درجة حرارة الغرفة. المياه الساقعة هتعمل صدمة للطفل و هتتعبه اكتر و مش هتجيب النتيجة المطلوبة.

• تغسلى ايدين و رجلين الطفل بفوطة مبلولة مياه فاترة برضه.

• تسيبي الكمادات على ظهر الراس و الابطين و منطقة الفخدين لحد ما تمتص الحرارة.

• تبللى الايادى و الأقدام بفوطة مبلولة بمياه فاترة عشان تشجعى على خسارة الحرارة من أطراف الجسم.

• الراحة مهمة كمان.

• و تدى خافض الحرارة اللى ينصح بيه الدكتور حسب سن و حالة الطفل.

• حاولى متضغطيش عليه فى الأكل خالص، لو شرب شوربة سادة كده بس كفاية عليه.

1 reply on “كل اللى محتاجة تعرفيه عن الحرارة عند الأطفال”

Leave a Reply