Categories
في المطبخ

كريب

من زمان و احنا عندنا الكريب ده حاجة أساسية فطار، غداء، عشا، أساسى مع كل وجبة. حادق ماشى، حلو.. مفيش أحلى منه فى الحلو. هو بالنسبة لى المنقذ و البديل للعيش فى الأيام اللى بنصحى منلاقيش عيش، معنديش وقت أعجن و أخبز. بأحول اليوم للأحتفال بالكريب و ممكن نقضيها طول اليوم وصفات كلها معمولة من الكريب.

نحشيه لحمة مفرومة و يبقى كانيلونى عالغدا، ندهنه جبنة و نديه للأطفال بدل الأومليت على الفطار، هيبقى تغيير. نحشيه نوتيلا و جنبه بولة ايس كريم، بقى حلو فاخر نقدمه للضيوف.

2 بيضة

كوب لبن

كوب دقيق

فانيليا

رشة ملح + رشة سكر

ممكن نضيف معلقة كبيرة زيت عشان نتأكد انها متلزقش

نخلط كل المكونات مع بعض بالمضرب اليدوى مش محتاجين خلاط ولا غيره.

لنتيجة أحسن نسيب الخليط يرتاح فى التلاجة لمدة 10 دقايق.

نسخن طاسة تيفال و ندهنها بالفرشاه زيت خفيف جداً.

عشان كلهم يطلعوا نفس المقاس استخدمى مغرفة الشوربة.

ننزل بالخليط فى الطاسة السخنة و نلف فى اتجاه واحد.

يدوب تاخد لون دهبى من اول ناحية، تقلبيها لثوانى على الناحية التانية و تبقى جاهزة.

اسهل طريقة تقلبى بيها الكريب هو انك تنقليها على طبق.
تنزلى الكريب على الطبق، الناحية المستوية لتحت.
تغطى الطبق بالطاسة و تقلبى الطبق و الطاسة.
سيبيها ٢٠ ثانية تاخد لون من الجهة التانية و تبقى خلصتى.
حشوات الكريب ملهاش نهاية الحادق زى الجبن و الزيتون، فراخ، بسطرمة أو حتى سجق.
لكن المنطق بيقول اذا وجد الكريب يبقى أساسى نوتيلا.
ممكن يجى بعد كده العسل و المربى أو زبدة الفول السودانى لكن الأساس نوتيلا و معاه فاكهة زى الفراولة و الموز.