Categories
9 شهور Featured

قبل ما تعملى شوبينج للبيبي

بعد الفرحة بالبيبي اللى هينورنا ده و بمجرد ما بدأت استوعب انى حامل حسيت بأنى عندى مليون حاجة اعملها. بدأت استوعب ان البيبي ده مسئوليتنا الكاملة و انه محتاج حاجات كتيرة جداً!! حاجات انا اصلاً معرفش عنها حاجة. بصراحة انا من النوع اللى بيحب الأطفال من بعيد، نلعب سوا و نضحك بس وقت الجد كنت بسيب اختى تأكّل و تغير لوحدها. زياده على كل ده انا من النوع المنظم جداً و بحب كل حاجة تبقى مثالية، فطبعاً اعدت اذاكر. ذاكرت البيبي بيحتاج ايه، و ليه. سألت كل اللى اعرفهم و سألت الأنترنت و طبعاً فى الآخر عملت قائمة بالكلام ده كله. بس قبل ما تبتدى تشترى فيه شوية حاجات لازم تعرفيهم:

 

١. متشتريش اى حاجة قبل ما تعرفى نوع البيبي. لو نفسك تجيبي حاجة اوى خليكى فى الألوان المحايدة مع ان الشوبينج لولد او بنت ليه طعم تانى لأنك هتركزى مع الألوان و الأشكال المناسبة.

٢. متجيبيش هدوم كتير فى مقاس واحد. خاصة فى الفترة الأولى بتاعت سن 0-6 شهور. الأطفال بيكبروا بسرعة جداً و مش هتلحقى تلبسى البيبي كل حاجة انتى جبتيها.

٣. مش هتبطلى شوبينج. و دى حاجة جميلة للشوباهوليكس زيي. اللى اكتشفته ان كل ما البيبي بيكبر احتياجاته بتتغير و مقاس اللبس بيتغير و انتى كمان بتكَوّنى فكره طفلك بيحب ايه و بيبقى احلى فى الوان عن غيرها.

٤. متحوشيش حفاضات قبل ما تعرفى وزن البيبي. ناس كتير دلوقتى بقت تشترى بامبرز بداية من الشهر الرابع او الخامس من الحمل و يحوشوه. الأفضل انك تشيلى الفلوس دى على جنب لحد ما تعرفى وزن البيبي قبل الولادة مباشرة. اطفال كتير مبيلبسوش مقاس 1 او بيلبسوه لفترة قليلة جداً. و العكس ممكن، لو الطفل بيكسب وزن ببطئ ممكن يطول فى مقاس عن غيره. مشكلة البامبرز بالأخص انه كمان مع التخزين الخاطئ المادة اللى بتمتص البلل بتنشف و الأستك بتقل فعاليته و ممكن يسرب للأسباب دى.

٥. متكتريش ببرونات و تتينة. مش كل الأطفال بتستجيب للتتينة او تحبها. نفس الموضوع مع الببرونة. حضرى عدد قليل لحد ما تعرفى استجابة البيبي للأتنين قد ايه و زودى العدد حسب الحاجة.

٦. الترافل سيستم احسن بكتير من انك تجيبي سترولر و كارسيت منفصلين. غالباً بيبقوا اخف فى الوزن و مصممين ان نظام الفتح و القفل يبقى اسرع عشان مصممة للأمهات اللى بتتحرك كتير. لو البيبي نام فى العربية، و معظم الأطفال بتعمل كده، مش لازم تصحيه عشان تنقليه السترولر. و الأحلى ان غالباً النظام كامل بيبقى ارخص من القطع المنفصلة.

٧. اشترى للفصل اللى البيبي هيتولد فيه، لو الطفل هيتولد فى الصيف يبقى مش هتحتاجى بطانيات تقيلة لحد دخول الشتا. ادى الأولوية لأحتياجات الصيف زى واقى من الشمس تركبيه على السترولر.

٨. على فكرة البيبي مش بيحتاج كل اللى احنا عايزين نجيبه ده. بس احنا اللى بنحب ولادنا اوى و عايزين نجيبلهم الدنيا كلها. حددى الأساسيات اللى فعلاً منستغناش عنها زى الهدوم، الترمومتر و غيرهم و ابتدى بيهم الأول. كده حتى لو الوقت عدى بسرعة هيبقى عندك الأساسيات و ابقى هاتى اللى ناقصك بعد الولادة.

٩. فكرى فى نفسك و انتى بتشترى كل حاجة. انا مثلاً قررت انى مش هاجيب شنطة بيبي عادية و بدلها هجيب باك باج تتلبس على الظهر لأنى عارفة انى مش هاعرف اشيل شنطة على كتف و البيبي فى الأيد التانية.

Leave a Reply

Your email address will not be published. Required fields are marked *