Categories
في المطبخ

فى حب البهارات و السبع بهارات

بحب البهارات! و مقدرش أتخيل الأكل من غيرها.

أنا من الناس اللى بتحب تشم الأكل جداً، مش أنا بس، لأ دى عيلتى كلها تقريباً، مهم أوى بالنسبة لنا نوصل لريحة حلوة و احنا بنطبخ. و ده بيوصلنا اننا وقت الأكل نضمن ريحة و طعم أحلى من بعض.

الناس أنواع و منقسمين فى النقطة دى:فيه فريق بيشجع الملح و الفلفل الأسود الكتير و الظاهر فى الأكل، و أنا أولهم. لازم أجيب الفلفل حبوب و اطحنه فى البيت عشان يبقى أقوى و أتقل.

و فيه فريق الكمون و برضه دول بيحطوه على كل حاجة، طبيخ ماشى، سلطة ماشى و ممكن يشربوه عادى .

و فيه كمان فريق التوم و الكسبرة أصحاب و لو حطوا توم لازم كسبرة و العكس.

و فريق القرفة و الجنزبيل مينفعش ننساه.

لو أنتى لسه مش محددة ميولك تجاه البهارات و وقت الطبخ بتحتارى تحطى ايه جربى تعملى خلطة السبع بهارات و خليها جاهزة عندك تحطيها على لحمة أو فراخ.

نصف كوب كمون

نصف كوب فلفل أسود

ربع كوب قرفة  مطحونة

نصف كوب حبهان

نصف كوب كزبرة ناشفة

ربع كوب قرنفل

ربع كوب جوزة الطيب  مطحونة

اخلطى المكونات كلها و احفظيها فى برطمان محكم الغلق.

لو عملتى كمية كبيرة شوية تقدرى تشيليها فى الفريزر لحد سنة.

يفضل تجيبى البهارات حبوب و تطحنيها انتى فى البيت، المطحون طازة ده بيبقي ريحته اقوى و الزيوت اللي فى الحبوب بتبقي لسه بخيرها.

أو تجيبى كله مطحون جاهز و تخلطى البهارات على طول.