Categories
في المطبخ

فريك بالخضروات المشكلة

زهقانين فراخ و لحمة؟ ولادكم متعبين أصلا فى أكل اللحوم؟ بس عايزين تأكلوهم بروتين و نشويات و خضروات. الحل ايه؟وجبة سهلة و سريعة فى حلة واحدة بكل العناصر الغذائية عشان نرضى كل أطراف الأسرة.

ربع كيلو فريك

بصلة

١ كوسة

١ جزر

١ بطاطس

 نصف كوب فاصوليا خضرا 

 نصف كوب بسلة

بروكلى

١ طماطم مبشورة

معلقة كبيرة صلصة

بهارات

بابريكا

جنزبيل

ملح و فلفل

الفريك يُفضل يكون نوع نضيف جداً عشان لو غير كده هيبقى مليان حصى و مع ذلك أنا بغسله كويس جداً و انقعه على الأقل نصف ساعة قبل الطبخ.

نفرم بصلة و نجهز الخضار؛ تنضيف و تقطيع مكعبات صغيرة. لو خضار محتاج طبخ زيادة زى الفاصوليا و البسلة نسلقه الأول 5 دقائق لكن أنا غالباً بكون مخزناه فى الفريزر أو بجيب كيس خضار مشكل مُجمد من السوبرماركت و أكمل معاه الكوسة و البطاطس و أى خضار فريش.

الوصفة هنا قابلة للتعديل و التغيير حسب الخضار المتاح فى البيت و المفضل ليكم طبعاً. يعنى الموجود يؤدى الغرض، فيه كوسة مفيش جزر، مش بتحبوا البطاطس، عادى كله شغال.

نشوح البصل الأول فى معلقة زيت كبيرة و بعدين ننزل عليها بالفريك، لازم الفريك قبل الخضار عشان الفريك يطلع مفلفل مش معجن.

نحط رشة ملح و فلفل و بهارات و بابريكا و جنزبيل و نشوح الفريك كويس جداً جداً و يُفضل نستخدم حلة غير قابلة للألتصاق عشان منحطش زيوت كتير.

ننزل بالخضروات كلها تقليبة مع الفريك و البهارات.

و بعدين الطماطم المبشورة و الصلصة، تقليبة واحدة. بعدها ننزل مياه مغلية بالكاد تغطى الفريك.

نعمل حسابنا أن الخضروات بتنزل مياه عشان كده المياه تغطيه بس.

بعد غلوة واحدة نوطى النار و نغطي الحلة 20 دقيقة.

بعد الـ20 دقيقية، نفتح نشوف و ندوق، لو الفريك أستوى كويس نطفى.

للتقديم نرش فوق الوش بصل أخضر أو بقدونس. 

ممكن كمان بعد إضافة المياه المغلية ندخله الفرن فى طاجن فخار يكمل سوا و هيطلع بشكل و طعم مختلف.

الوصفة قابلة لأضافة أى نوع لحوم أو فراخ قبل ما ننزل الفريك بس تكون نوع يستوى بسرعة زى قطع صدور الفراخ أو اللحمة المفرومة .

Leave a Reply