Categories
في المطبخ

فرايد رايس – رز بالخضروات على الطريقة الآسياوية

عندى رز باقى من غدوة امبارح. ارميه؟ لأ طبعاً! هنتغدى فرايد رايس النهاردة. الوصفة دى كمان بتبقى حلوة لما الواحد بيبقى نفسه يمسك طبق فيه كل حاجة و ياخده فى حضنه و انتى قاعدة على الكنبة قدام التليفزيون، يا سلام!

 

1 كوب رز ابيض مطبوخ

½ كوب خضروات مشكلة مسلوقة: فاصوليا، بسلة، جزر، ذرة، بروكلى

2 معلقة كبيرة زيت نباتى

3 مشروم مقطعة شرائح رفيعة

1 معلقة كبيرة صويا صوص

1 معلقة صغيرة جنزبيل بودرة

1 فص ثوم مهروس

½ معلقة صغيرة مستردة

1 معلقة كبيرة زبادى

ملح و فلفل حسب الرغبة

 

فى حلة او ووك سخنى الزيت و شوحى فيه الثوم لحد ما يبقى ذهبى. ضيفي له المشروم و قلبى.

بمجرد ما المشروم يستوى ضيفي له الخضروات و الرز.

بمجرد ما الرز يسخن ضيفي له الصويا صوص و الزنجبيل و المستردة و الزبادى. و الملح و الفلفل زى ما تحبى.

على نار هادية، قلبى الرز بخفة و سيبيه على النار 5 دقايق عشان يمتص السوائل و يبقى سميك شوية.

حمري بيضة بسرعة و حطيها فوق الوش وقت التقديم. ممكن تقدميه مع اى أطباق آسياوية، لحوم او فراخ. مع انه لوحده كفاية.