Categories
في البيت

غسيلى زى الفل

زمان جداتنا كان عندهم يوم الغسيل و أوضة الغسيل مروراٌ بالنقع ثم الغلى و الدعك و الشطف. احنا بالنسبة لهم مرفهيين لمجرد استخدامنا للغسالة الأوتوماتيك اللى بتقوم بكل الأعمال الشاقة دى بضغطة واحدة من صباعك.
لكن بالرغم من التقدم و التكنولوجيا المبالغ فيها إلا إن لسه فيه مشاكل وغلطات الغسالات متقدرش تحلها.

 

• أول حاجة تمسكى الهدوم كلها تتأكدى أن مفيش حاجة فى الجيوب و الزراير فى مكانها مش هتقع

• الهدوم اللى بتبهت متحطيهاش فى الغسالة اكيد مع باقى اللبس، اغسليها على ايدك لوحدها. ازاى تعرفى انها بتبهت؟ تاخدى جزء منها على الحوض و رشة مسحوق يدوى و انقعيها و لو دقيقة واحدة فى الماية و المسحوق، لو نزلت لون تبقى بتبهت غير كده تمام

• لبس الخروج و القطيفة أو اى حاجة فيها وبر اغسليها على ضهرها أحسن. و كمان التيشيرت المطبوعة تتقلب على ضهرها عشان الطباعة متبدأش تقشر.

• افصلى الهدوم لو تقدرى. الفوط و الملايات و لبس الأطفال و الملابس الداخلية بيحتاجوا درجة حرارة عالية. انما الاقطان و لبس الخروج الخفيف مش بيحتاج حركة كتير هو بيبقى شبه نضيف خليه فى غسلة لوحده

• مهم أوى تقرأى الأرشادات اللى بتبقى مكتوبة على التيكيت. دايماً بيبقى فيه مثلث مكتوب فيه درجة الحرارة المناسبة للقماش و علامات إرشادية اذا كان مناسب انه يتعصر و يتكوى.

• ماتمليش الغسالة أبداً على آخرها. الأحسن تشغليها على مرتين من انك تمليها عالأخر و الغسيل يطلع مش نضيف. على الأقل يبقى فيها مكان تدخلى ايدك و تفرديها. الوزن الزيادة كمان بيأثر على موتور الغسالة و يقصر عمرها.

• المسحوق مش بكتره أبداً بفاعليته أهم و تحطى المعيار المظبوط لكل غسلة. لو معاه حطيتى غطا ديتول يبقى ضمنتى نضافة و تطهير.

• أول ما الغسالة تخلص طلعى منها الغسيل فوراً و سيبى الباب مفتوح شوية عشان الغسالة تتهوى و ميبقاش فيها ريحة مش حلوة و طبعاً ممكن تنشفيها بفوطة نضيفة. الرطوبة من الغسيل المبلول هى إللى بتعمل ريحة لانها بتكوّن بكتيريا.

• انشرى علي طول، ماتسيبيش الهدوم فوق بعضها فى الطبق تكمكم. و عشان تحافظى على ريحة الغسيل الحلوة زى أول ماطلعتيه من الغسالة تلميه أول ما ينشف و على الدولاب على طول

• انصحك تجيبى منشر داخلى بس نوع نضيف استانلس عشان ميصديش. هيريحك فى أيام التراب أو فى الشتاء و المطرة و أى مفاجأت، انتى بتنشرى جوه براحتك. و هو كمان أفضل للهدوم إللى بتمط من النشر لمدة طويلة او للأنسجة الضعيفة.

Leave a Reply

Your email address will not be published. Required fields are marked *