Categories
في المطبخ

عجينة الزبادى السهلة

أنا كنت أول مابسمع كلمة عجينة و خميرة بخاف و محاولش حتى أجرب و كانت من الحاجات اللى عملالى عقدة فى المطبخ. لحد ماقررت “ايه يعنى هجرب دول شوية دقيق مش هخسر كتير”، فيه بس شوية تكات و حركات عرفتها و مشيت عليها لحد ماوصلت للعجينة دى. دلوقتى بقت المعتمدة بالنسبة لى لسهولتها طبعاً و بأنصح أى حد مبتدئ يجربها فى الأول.

3 كوب دقيق
معلقة كبيرة ممسوحة خميرة
معلقة كبيرة سكر
ربع كوب زيت زيتون أو عباد الشمس
علبة زبادى
رشة ملح
معلقة كبيرة ممسوحة باكينج بودر
مياه دافيه للعجن

فى علبة صغيرة نحط الخميرة و السكر مع 2 معلقة كبيرة دقيق و نصف كوب مياه دافية.

نسيبها 15 دقيقة لحد ماتعمل رغاوى. يبقى كده اتأكدنا ان الخميرة شغالة.

نكون مجهزين فى بولة كبيرة اللى هنعجن فيها الدقيق منخول 3 مرات و مخلوط معاه الملح و الباكينج بودر.

نعمل حفرة فى نص الدقيق و ننزل الزيت و الزبادى و بعدين الخميرة.

غالباً مش هتحتاج مياه كتير بعد الزبادى و الزيت و المياه بتاعة الخميرة.

نعجن كويس أوى على الأقل 10 دقايق.

نسيبها تخمر من نصف ساعة لساعة.

العجينة دى ممكن نعمل بيها بيتزا او ممكن نحشيها جبن تبقى زى باتيهات أو نحشيها حلو زى المربى او الشوكولاتة .