Categories
9 شهور

طرق طبيعية لزيادة لبن الام.. بدون رغي

 

اول ما ولدت (و من قبلها بشهرين مثلاً) سمعت كلام عجيب كتير عن الرضاعة و ازاى ترضعى و ازاى تزودى اللبن و مش عارفة ايه. اللى فعلا نفعنى انى عملت الحاجات دى. بدون مناقشة. سمعت و سئلت و قريت اكتر و رسيت على شوية الحاجات دول.

١. ابدأى مباشرة من بعد الولادة. متفوتيش اكتر من 24 ساعة.

٢. ملامسة الجلد للجلد بينك و بين البيبي بتعمل المعجزات فعلاً. Skin to skin contact

٣. ذاكرى كويس وضعيات الرضاعة المختلفة و اتمرنى من قبل ما تولدى على مخدة صغيرة او فوطة مبرومة.

٤. ذاكرى اكتر ازاى المفروض يبقى وضع الحلمة فى فم البيبي

٥. رضعى طول الليل فى المستشفى. لحد ما يظهر لبن السرسوب. Colostrum

٦. الكام نقط اللى هيظهروا فى اول يومين دول كفاية جداً. الكوليستروم ده كنز فيه كل الغذا اللى البيبي محتاجه.

٧. اوعى تستسلمى. الحالة النفسية بتأثر فى كمية اللبن.

٨. خليكي واقعية. مش هتولدى من هنا و الشلال هيشتغل! اللبن بتتغير كميته و كثافته مع نمو البيبي و تغير احتياجاته.

٩. حطى فى بالك فكرة مهمة: انتى و البيبي بتتعلموا حاجة جديدة سوا. البيبي مش بيعرف يرضع لسه و انتى مش عارفة الوضعيات الصح اللى ممكن تساعديه بيها.

١٠. كريمات الرضاعة المخصصة انها تحافظ على الحلمة من التشقق مهمة اوى فى اول أسابيع. هتبعد عنك التشققات إللى ممكن تؤدى لنزيف او التهابات و تعطل عملية الرضاعة. ابدأى من قبل الولادة بشهر بترطيب الحلمات مرتين يومياً.

١١. راجعى خبيرة الرضاعة قبل الولادة و بعدها. هى ممكن تساعدك انتى و البيبي على الطبيعة.

١٢. مع ظهور آلام فى الحلمة او الثدى، خبيرة الرضاعة ممكن تنصحك باستخدام واقى الحلمة nipple shield. إللى ممكن ينقذك فعلاً و يساعدك تكملى طبيعى.

١٣. استخدام الشفاطة breast pump او عصر الثدى hand expressing من الطرق الفعالة جداً. بتحتاج شوية مجهود لكن نتيجتها ممتازة.

١٤. اللبن بيمر بفترات بيزيد و يقل فيها. بلاش تتخضى. ده بيكون عشان تأثير الهرمونات او بيتغير مع احتياجات البيبي.

١٥. متقرريش ان لبنك مش كفاية و انك محتاجة لبن صناعى من غير ما تسألى الدكتور اللى متابع وزن البيبي.

١٦. تقدرى ترجعى دايما لدكتورك عشان يوصفلك دوا يساعدك. فيه ادوية كتير مصنوعة من مكونات طبيعية.

١٧. لو قررتى انك هتكملى لبن صناعى متزعليش. بالعكس ركزى انك تدى البيبي الحاجات اللى هو محتاجها منك فعلا انك تضميه ليكى و تحسسيه بوجودك.

Leave a Reply

Your email address will not be published. Required fields are marked *