Categories
رمضانيات

طاجن حمام محشى رز

الوصفة معمولة علي عدد جوز حمام، و طبعا انتي ممكن تضاعفي الكمية حسب عدد الحمام اللي عندك.

٢ حمامة
١ ونص كوب رز مغسول ومتصفى
بصلة كبيرة مبشورة
ملح، فلفل ، بهارات، قرفة، جوزة الطيب
حبهان، مستكة، ورق لاورا
٢ ملعقة سمن

نتبل البصلة بالملح والفلفل الاسود والقرفة وقليل من جوزة الطيب والبهارات المشكلة
نحط نص كمية البصل على الرز
وناخد نص كمية البصل الباقي نقلبها علي النار في معلقتين سمن لحد ماريحة التوابل تطلع
ننزل عليها الرز اللي فيه باقي البصلة المتبلة ونقلبه علي النار علشان ياخد لون
وبعدين نحط له حوالي ربع كوب ميه ونخليه يتشرب الميه دي ونطفي ونسيبه يبرد شوية.
نجهز الحمام اللي غسلناه كويس باننا نجيب ملح وفلفل وقرفة نخلطهم مع بعض ونتبل بيهم جوا كل حمامة
ونبدأ نحشيها بالرز ونزقه جوا منطقة الزور
المهم منملهاش اوي علشان الرز لسه هايزيد جواها لما يستوي عشان الرز ميطلعش بره الحمام
وبعدين نقفل كل حمامة من الرجلين
ونكون مجهزين حلة فيها ميه بتغلي علشان نسلق الحمام ونحط فيها حبهان وفص مستكة وورق لاورا
ننزل فيها الحمام يتسلق نص سلقة علشان هنكمل تسويته في الطاجن.
نخليه علي النار حوالي ٢٠ دقيقة ونطفي عليه وننقله في الطاجن اللي احنا حاطين فيه باقي الرز
ونضيف عليه الشوربة بتاعته لحد ما تغطيه ونقفل الطاجن بورق الفويل
نحطه في الفرن في الرف الاوسط لمدة ساعة الا ربع تقريباً