Categories
رمضانيات

شوربة كريمة الدجاج

شوربة كلاسيكية أساسية علي سفرة رمضان. مش محتاجة تشتري اكياس الشوربة الجاهزة لانها فعلاً سهلة في التحضير و مش بتاخد وقت. ده غير ان الطعم احلي بكتير. و بدون مواد حافظة.

١ ليتر شوربة دجاج مصفاة
١ بصلة اخضر
١ معلقة كبيرة دقيق
١ كوب لبن
١ كوب كريمة طبخ
ملح و فلفل علي ذوقك
رشة جوزة الطيب
١ معلقة كبيرة سمن او زيت
٢٠٠ جرام مكعبات صدور فراخ
١ فص توم مفروم

في حلة سخنة هننزل السمن و معاه البصل الاخضر مقطع دواير.
بمجرد ما البصل ريحته تطلع ننزل فص التوم، عايزينه ينزل طعم التوم في السمن بس ميتحرقش.
اول ما نشم ريحة التوم ننزل مكعبات الفراخ.
قطعيها صغير عشان تستوي بسرعة.
بهري الفراخ بملح و فلفل بس.
عايزين الفراخ تاخد لون خفيف.
دلوقتي حطي الشوربة علي الفراخ و سيبيها تغلي.
اتأكدي ان الفراخ استوت قبل ما تكملي للخطوة الجاية.
في كوباية قلبي اللبن و الدقيق مع ملح و فلفل و جوزة الطيب.
و الشوربة بتغلي نزلي عليها خليط الدقيق و قلبي بسرعة عشان ميعملش اي تكتلات.
وطي النار و قلبي الشوربة لحد ما توصل للقوام اللي تحبيه.
في الاخر ضيفي الكريمة و اطفي عليها.

احلي تقديم مع شرائح عيش محمص جنبها.