Categories
9 شهور Featured

شنطة المستشفى

انا بدأت احضر للولادة بدرى شوية. بس انا بحب ابقى مستعدة و برضه حاجة مريحة نفسياً انى شيلت عن بالى فكرة انى لسه هأحضر شنطة المستشفى. بالرغم من ان المستشفى قريبة جداً من البيت بس فكرة ان جوزى ممكن يفوت الولادة و وصول البيبي عشان يجيب حاجتنا من البيت مرعبة شوية. تحضير الشنطة مخليها قدامى و بأزود فيها اى حاجة بفتكرها اول بأول. (يا رب بس منساش حاجة مهمة فى الآخر).

حاجة كمان لاحظتها ان الأب المسكين دايما بيتنسى. الأم بتحضر شنطة ليها و للبيبي و شكراً على كده. عشان كده انا حرصت انى اعمل حسابه هو كمان.

طبعا هتزودى العدد حسب الأيام اللى هتقضيها. لو عارفة انك هتولدى قيصرى، اعرفى من الدكتور هتقضى كام يوم فى المستشفى. مش كل اللى هتاخديه هتستعمليه، بس احسن ما تحتاجيه و يبقى مش موجود.

اشترى ترافل سايز من الشامبو و الكلام ده عشان هما كلها كام يوم مش لازم تشيلي كل الأزازة دى. و ممكن كمان تجيبى الأزازيز المصممة للسفر و تفضى شوية فيها على قد ما هتستعملى.

اتأكدى من وزن البيبي فى آخر زيارات عشان تحضرى مقاس البامبرز المناسب. كل علب البامبرز مكتوب عليها وزن البيبي، ممكن كمان تراجعى المعلومة دى مع الممرضة المسئولة فى قسم الولادة.

و طبعا لازم تراجعى كل اللى هتجيبيه مع المستشفى و الدكتور. الأغلبية دلوقتى بيدوكى ورقة بكل الطلبات الأساسية مع بداية الشهر التاسع.

شنطة المستشفي الأم

اعملى شنطة واحدة. امهات كتير بتقرر انها تجيب الدايبر باج و معاها شنطة ليها و للأب. عيب الموضوع ده ان ممكن تنسى شنطة فى البيت او العربية. ممكن تنسى انتى رتبتى الحاجات ازاى و كمان شيلة على الفاضى. شنطة واحدة كفاية اوى. انا نزلت اشتريت شنطة مخصوص، و حرصت انها من جوه تبقى متقسمة لمنطقتين او اكتر. ناحية للبيبي و ناحية لماما و بابا. مش لازم تعملى كده، ممكن تستعملى اى شنطة سفر خفيفة عندك و تقسميها انتى بطريقتك. فيه هدوم للبيبي بتيجى فى شنط بلاستك او قماش جميلة بكباسين ممكن تستعمليهم فى التنظيم. ممكن كمان ترصى الشامبو و الحاجات دى فى نص الشنطة عشان تديكي احساس ان الشنطة مقسومة.

شنطة المستشفي الأب

و انتى بترتبى الشنطة خلى فى بالك اجراءات المستشفى. هما هيعرفوكى هيحتاجوا ايه الأول. خلى الحاجات دى على وش الشنطة و سهل الوصول ليها. حضرى كمان غيارات البيبي فى مجموعات و ممكن تحطى مع كل مجموعة واحد بامبرز. جمعى اى حاجة ممكن تغرق الشنطة فى زيبلوك باج. و اتأكدى انهم مقفولين كويس.

شنطة المستشفي المولود

متنسيش انك هتحتاجى راحة تامة، لو عندك وقت ممكن تفضى شنطتك فى الدولاب و تعرّفى مامتك او اختك مكان كل حاجة عشان يعرفوا يساعدوكى بسهولة.

آخر حاجة، اعرفى ايه الأوراق المطلوبة منك. بعض المستشفيات بتطلب اوراق زيادة. فى حالة ان عندك تأمين صحى احرصى انك تخلصى الأجراءات الخاصة بالولادة و تحضرى المستندات دى كلها فى شنطتك.

ممكن تطبعى الليست مباشرة من هنا شنطة المستشفي من ست.

2 replies on “شنطة المستشفى”

Leave a Reply