Categories
مع العيال

شنطة البيبي

من اكتر الحاجات اللي تعبتني في التدوير عليها و التفكير فيها قبل الولادة. مشكلتي معاها كانت اني مكنتش اعرف احتياجاتي عاملة ازاي و بالتالي مش قادرة اتخيل انا عايزة شكلها عامل ازاي و لا احدد هدفها ايه. بعد بحث طويل و خبرة ام جديدة قررت اجيب باك باج و مش شنطة عادية. و انتي قبل ما تشترى شنطة البيبي اللى هتشيل الحفاضات و الغيارات و الذى منه و انتى بره البيت لازم تهتمى بالنقط دى:

• تكون بتتغسل: مش كل الشنط بتتصنع من اقمشة ممكن تدخل الغسالة. بعض الشنط كمان بتبقى ووتربروف و دى مهما حطتيها فى الغسالة عمرها ما بترجع زى الأول بتحتاج تتنضف بالأيد بفرشة و صابون عشان تنضف، مين عنده وقت! هاتى شنطة ممكن ترميها فى الغسالة كل اسبوعين مثلاً و اشترى دماغك.

 • الجيوب: الموضوع ده بالأخص غلس شوية لأن لو الشنطة مليانة جيوب هتحسى ان فيه مساحة كتير مهدرة و هتقعدى تفكرى انتى حطيتى الكريم فين، و الحاجة هتضيع جوة الشنطة من الآخر. طبعا مش محتاجة اوصفلك الشنطة اللى من غير جيوب هتعذبك انك تلاقى كل حاجة من الأساس، هتبقى عاملة زى البلاعة و السلام. الحل؟ 3 جيوب هو التوازن المظبوط: جيب للهدوم، جيب للوازم الغيار، و جيب للأكل. لو انتى منظمة جداً جداً ممكن تجيبى شنطة من غير جيوب و تجيبي معاها شنط صغيرة و تقسمى كل حاجة فى مجموعات على مزاجك جوا الشنطة.

• بتتشال بطرق مختلفة: ممكن تتشال على الكتف او الظهر او كروس. مش هتملى الشنطة كل مرة نفس الكمية، فيه ايام هتبقى عارفة انك مقضية اليوم برة و ملياها على آخرها يبقى هتشيليها على ضهرك. ايام هتنزلى ساعتين و هتحطى حاجتك كمان فيها يبقى خليها على كتفك. حتى لو مش مليانة اوى و انتى معاكى البيبي لوحدك، الشنطة على كتفك هتخلى ايديكى فاضية للبيبي بس.

• الفلكروVelcro : بصراحة انا مبحبوش، صوته مزعج جداً خاصة لو عايزة تغيري للبيبي و هو نص نايم و تفتحى الفلكرو بدوشته جنبه بتبقى مأساه. هاتيها بسوست و تكون هادية برضه. ده غير انه مع الأستعمال بيبوظ و هتلاقى الشنطة مفتوحة طول الوقت.

• بتقف لوحدها: بصراحة حاجة مكونتش واخدة بالى منها لحد ما حد نبهنى ليها. هى طبعاً مش حاجة اساسية بس فعلاً لما الشنطة بتبقى ثابتة بتسهل انك تطلعى منها اللى انتى عايزاه بأيد واحدة.

• مقاسها مظبوط: متطمعيش و تجيبي شنطة عملاقة و تبقى شايلاها على الفاضى، الحاجة هتتوه جواها. و العكس صحيح لو الشنطة صغيرة مش هتكفى حاجة أصلاً. لو هتشترى قبل وصول البيبي يبقى جهزى الحاجات اللى هتاخديها معاكى فى نزولة طويلة عشان تعرفى حجمهم قد ايه. هيسهل عليكى اختيار الشنطة كتير.

• الوزن: طبعا هتركزى ان الشنطة يبقى وزنها خفيف و هى فاضية لأنك طبعا هتمليها حاجات.

• ماما: اعملى حسابك على جزء مخصص ليكي لأن معظم الأمهات بيفضلوا يشيلوا شنطة واحدة بدل اتنين. ممكن تدورى على شنطة فيها جيب خارجى عشان تعرفى توصلى لحاجتك بسهولة و انتى بره و كمان تفصليها عن حاجة البيبي. و ممكن كمان تيجيبي شنطة مكياج جميلة تلمى فيها كل حاجة: محفظتك، الموبايل، مكياجك و مطهر الأيدين.

طيب هتاخدى معاكى ايه بقى؟

الملابس: هتاخدى معاكى غيار كامل و تزودى طبعا حسب المدة اللى هتقيها بره. ملابس خارجية و داخلية. لو نيوبورن خدى غيار زيادة عشان حوادث التسريب بتبقى اكبر. و هتعملى حساب كوفرتة خفيفة عشان لو البيبي نام تغطيه بيها. تعملى حسابك كمان فى الشتا على شرابات و غطا للرأس و چاكيت خفيف.

الغيار: طبعا هتاخدى مشمع الغيار و وايبس/مناديل مبللة و مناديل عادية و حفاضات و كريم الحفاضات. حطى معاكى حفاض لكل ساعتين هتقضيهم برة. ممكن تزودى فوطة يد عشان القشط او النضافة عامة.

الحفاض حفاضة التهاب التهابات

الأكل: اكيد البيبي هيجوع. خلى معاكى علبة خضروات مهروسة، عصائر، زبادى، بسكوت… دايما خلى معاكى كذا حاجة ممكن البيبي يرفض الزبادى بس ياكل الخضروات. و ببرونة او ازازة المياه و السكاتة اللى بيحبها، خلى معاكى اكتر من واحدة لو البيبي بتاعك بيحبها لأنها بتقع و بيبقى لازم تستعملى واحدة معقمة. و طبعاً معاهم كام بافتة.

صيدلية متحركة: فى الأسابيع الاولى كان لازم أتحرك بدواء الغازات، قطرة العيون، بخاخة كحول لتنضيف السرة او التعقيم عامةً، مرهم الالتهابات و ترمومتر أكيد مع قطن للودان. مع الوقت الصيدلية اتحولت لمجموعة عناية شخصية. كريم مرطب، قصافة، فرشة شعر. الترمومتر و قطن الودان و الكحول هم إللى ثابتين على موقفهم. ده الى جانب علبة الأسعافات الأولية.

اختيارى: لو ناوية ترضعى برة يبقى هتزودى كام حاجة ليكي بقى. هتاخدى غطاء الرضاعة او سكارف من عندك عشان تتغطى بيه. و فوط صدر و كريم الرضاعة. ممكن تزودى للبيبي الكولونيا بتاعته و لعبة صغيرة. خلى معاكى كمان كيس بلاستك احتياطى عشان لو غيرتى للبيبي فى العربية و مفيش علبة زبالة قريبة.

اهم حاجة انك تاخدى معاكى الحاجات بذكاء. يعنى الهدوم تطبقيها عشان تاخد مكان اصغر. و تجمعيها جنب بعضها مع حفاض عشان يبقى عندك مجموعات جاهزة على اللبس على طول. هاتى من لوازم الغيار مقاس صغير، مش لازم تشيلي الأزازة اللى عندك فى البيت. طبعا هتوفر فى المساحة و الوزن. ممكن كمان تجيبي الأزايز اللى بتبقى مصممة للسفر و تمليها بنفسك. احفظى الببرونات فى جراب حرارى عشان اللبن او العصير ميبوظش. و الأكل خليه فى علبة بتحفظ الأكل او اكياس محكمة الغلق عشان مفيش حاجة تدلق جوا الشنطة.

شنطة البيبي

Leave a Reply

Your email address will not be published. Required fields are marked *